Վրացական կողմն ըմբռնում է դրսեւորել կապված Երեւանում ՀՀ ԱԺ նախագահ Գալուստ Սահակյանի եւ Հարավային Օսիայի խորհրդարանի ղեկավար Անատոլի Բիբիլովի հանդիպման հետ: Այս մասին, այսօր՝ մայիսի 5-ին, ԱԺ-ում լրագրողների հետ զրույցում նշել է ՀՀԿ խմբակցության ղեկավար Վահրամ Բաղդասարյանը:
Նա նշել է, որ Հարավային Օսիայի խորհրդարանի խոսնակը ԼՂՀ է ժամանել խորհրդարանական ընտրությունների ընթացքին հետեւելու նպատակով: վերադարձի ճանապարհին, Երեւանում նա ցանկացել է իր ցավակցությունները հայտնել ապրիլի 24-ի առթիվ: «Մարդը մտել է, ցավակցել, գնացել է: Ոչ մի պաշտոնական հանդիպում չի եղել: Իսկ մարդկանց արգելել ընդհանրապես հանդիպել, կարծում եմ այնքան էլ խելամիտ չէ»,-հայտարարել է Բաղդասարյանը:
«Սխալ ինֆորմացիա էր գնացել, ինֆորմացիան ուղղվել է: Պաշտոնական հանդիպում եղել է ոչ թե ՀՀ ԱԺ նախագահի, այլ ԼՂՀ ԱԺ նախագահի հետ: Միջպետական սկանդալ բառը մի քիչ կրճատեք, նման սկանդալ չի եղել ու չէր կարող լինել: Իսկ հանդիպումների մեջ ազատ են: Եթե վաղը Չեչնիայից կլինի, Ադրբեջանից էլ մարդ գա ու ցանկություն հայտնի մեզ ցավակցելու՝ ես հաճույքով կընդունեմ»,-ընդգծել է ՀՀԿ խմբակցության ղեկավարը: