Չորաթանցի Ազատը մայիսի 1-ին դարձավ 3 տարեկան. լյարդի ֆիբրոզով տառապող փոքրիկին այդ օրը հյուր էր եկել «արջուկը», որին խոստացել է՝ այլեւս չարաճճիություններ չի անելու:
«Շատ ճարպիկ, աշխույժ երեխա է, անընդհատ շարժման մեջ է: Արջին խոստացել է՝ այլեւս չարություններ չանել: Տեսնենք՝ խոստումը կպահի, թե ոչ»,- ասում է Ազատի մայրը՝ Անուշիկ Օհանյանը:
Տավուշի մարզի սահմանամերձ գյուղի փոքրիկ բնակչի հիմնական զբաղմունքը «կռիվ-կռիվ» խաղալն է, մշտական նախադասությունը՝ «թուրքերը հայերին նեղացրել են, մեծանամ, գնալու եմ թուրքերի հետ կռվեմ»: Ազատին իր նպատակին հետ է պահում 1,5 տարի ի հայտ եկած հիվանդությունը:
3-ամյա չորաթանցու մոտ 2013թ. դեկտեմբերին հայտնաբերվել է լյարդի ֆիբրոզ: Նրան անհապաղ լյարդի փոխպատվաստում է հարկավոր, որը հնարավոր է անել միայն Գերմանիայում կամ Իսրայելում: Սահմանամերձ գյուղում ապրող ծնողներն իրենց աշխատավարձով կարողանում են միայն ամենօրյա դեղերը գնել:
«Դեղորայք է ընդունում, որ լեղապարկը կամ մյուս օրգանները չախտահարվեն: Վերջերս գրիպով հիվանդացել էր, տարանք ստուգման, պարզվեց՝ փայծաղն ավելի է մեծացել»,- շարունակում է Անուշիկ Օհանյանը:
Փոքրիկի բուժման համար անհրաժեշտ է 70-100 հազար ԱՄՆ դոլար: Այս պահին հավաքվել է ընդամենը 1400 ԱՄՆ դոլար:
Ազատին օգնելու համար ՎՏԲ - Հայաստան բանկում բացվել է հաշվեհամար:
AMD 16039005679600
USD 16039005679601
EUR 16039005679602
RUR 16039005679603
Հաշվեհամարը բացվել է երեխայի հորաքրոջ անունով՝ Օվսաննա Ուդումյան Լյովիկի: Երեխայի մայրիկի հեռախոսահամարն է՝ 077635773։