ՀՀ վերաքննիչ քրեական դատարանն այսօր՝ մայիսի 5-ին որ մերժեց Տաթեւիկ Հակոբյանին հանձնաժողովային դատաբժշկական փորձաքննություն նշանակելու մասին տուժող կողմի ներկայացուցիչ Ռուբեն Բալոյանի ներկայացրած միջնորդությունը։
«Կողմը դատարանին չներկայացրեց այնպիսի հանգամանքներ, որոն կապացուցեին, որ առաջին ատյանի դատարանը անհիմն է որոշել մերժել ներկայացված միջնորդությունը»,-ասաց դատավորը։
Այլ միջնորդություններ կողմերը չներկայացրին։ Դատարանը հեռացավ խորհրդակցական սենյակ։ Դատարանն իր որոշումը կհրապարակվի այսօր՝ մինչեւ աշխատանքային օրվա վերջ։
Հիշեցնենք, որ 2013 թվականի հոկտեմբերի 20-ին, ժամը 21:20-ին Եղվարդ-Երեւան մայրուղու 32-րդ կմ-ում երկու ավտոմեքենա իրար են բախվել: Պատահարի հետեւանքով 7 մարդ մարմնական վնասվածքներով տեղափոխվել է հիվանդանոց, այդ թվում՝ դերասան Վարդան Պետրոսյանը: Ավելի ուշ Էդգար եւ Էդուարդ Հակոբյան եղբայրները մահացել են:
Փաստի առիթով հարուցվել էր քրեական գործ՝ ՀՀ Քրեական օրենսգրքի 242 հոդվածի 3-րդ մասով: Վարդան Պետրոսյանը ձերբակալվել էր: Դատաքննությունը սկսվեց 2014 թվականի մարտի 12-ին: Հայաստանի Կոտայքի մարզի ընդհանուր իրավասության դատարանը 2015թ. հունվարի 29-ին մեղավոր ճանաչեց Վարդան Պետրոսյանին՝ նրան դատապարտելով 5 տարի ժամկետով ազատազրկման:
Դատախազը եւ տուժող կողմը բողոքարկել են առաջին ատյանի որոշումը: