ՀՀ Վերաքննիչ դատարանն այսօր՝ մայիսի 5-ին, անփոփոխ թողեց դերասան Վարդան Պետրոսյանի գործով առաջին ատյանի դատարանի որոշումը:
Նշենք, որ որոշման հրապարակման ժամանակ մեղադրողը եւ տուժողի ներկայացուցիչ Ռուբեն Բալոյանը ներկա չէին:
Տուժող Արթուր Հակոբյանը եւ Նաիրա Հայրապետյանը վրդովմունքով արձագանքեցին դատարանի որոշմանը եւ NEWS.am-ի հետ զրույցում ասացին, որ բողոքարկելու են դատարանի վճիռը:
«Բոլորը ծախված են, մենք գիտենք, որ Վարդանը հարբած է եղել, դա նույնիսկ իր հարազատներն են ասել: Մենք չենք պատրաստվում հաշտվել, որովհետեւ մեր երկու ջահել երեխեքի գլուխն ա կերել»,- ասաց Արթուր Հակոբյանը:
Հիշեցնենք, որ 2013 թվականի հոկտեմբերի 20-ին, ժամը 21:20-ին Եղվարդ-Երեւան մայրուղու 32-րդ կմ-ում երկու ավտոմեքենա իրար են բախվել: Պատահարի հետեւանքով 7 մարդ մարմնական վնասվածքներով տեղափոխվել է հիվանդանոց, այդ թվում՝ դերասան Վարդան Պետրոսյանը: Ավելի ուշ Էդգար եւ Էդուարդ Հակոբյան եղբայրները մահացել են:
Փաստի առիթով հարուցվել էր քրեական գործ՝ ՀՀ Քրեական օրենսգրքի 242 հոդվածի 3-րդ մասով: Վարդան Պետրոսյանը ձերբակալվել էր: Դատաքննությունը սկսվեց 2014 թվականի մարտի 12-ին: Հայաստանի Կոտայքի մարզի ընդհանուր իրավասության դատարանը 2015թ. հունվարի 29-ին մեղավոր ճանաչեց Վարդան Պետրոսյանին՝ նրան դատապարտելով 5 տարի ժամկետով ազատազրկման:
Դատախազը եւ տուժող կողմը բողոքարկել են առաջին ատյանի որոշումը: