Ամերիկահայ գրող, մի շարք մրցանակների արժանացած դրամատուրգ, դերասան Էրիկ Պողոսյանը Հայոց ցեղասպանության համար վրեժ լուծած չորս շարքային ամերիկացիների մասին պատմող նոր թրիլլեր է հրատարակել: Իր գրքի մասին Պողոսյանը պատմել է ամերիկյան «Newsmax TV» հեռուստաալիքի «The Steve Malzberg» հաղորդման ընթացքում:
««Նեմեսիս» գործողություն. Հայոց ցեղասպանության համար վրիժառության սպանության դավադրություն» վերնագրով գիրքը պատմում է այն մասին, որ կյանքի ապահովագրությամբ զբաղվող գործակալը, թերթի խմբագիրը, ինժեներական ֆակուլտետի ուսանողն ու դիվանագետը սպանության համար պատմության մեջ ամենից արդյունավետ խումբն են ձեւավորում:
«Մասաչուսեթսից խումբը 1921 թվականին միավորվում է եւ իրեն «Նեմեսիս» կոչում՝ ի պատիվ հունական վրիժառության աստվածուհի Նեմեսիսի, եւ խոստանում վրեժ լուծել Հայոց ցեղասպանության զոհերի համար»,- նշվում է հեռուստաալիքի կայքում:
