ԼՂՀ օմբուդսմեն Յուրի Հայրապետյանը մտադիր է քայլեր ձեռնարկել՝ Արսեն Բաղդասարյանի ճակատագրի հանդեպ միջազգային հանրության ուշադրությունը գրավելու համար: Այս մասին նա հայտարարեց NEWS.am-ի թղթակցի հետ զրույցում:
Արցախի մարդու իրավունքների պաշտպանն ընդգծեց, որ Արսեն Բաղդասարյանի նկատմամբ գործ հարուցեցին՝ ի պատասխան Լեռնային Ղարաբաղում ադրբեջանցի երկու դիվերսանտների դատավարության: Ադրբեջանում Բաղդասարյանին որպես «դիվերսանտ» եւ «հետախույզ» են ներկայացրել: «Իմ տեղեկություններով, գերեվարման պահին Բաղդասարյանը հեռացված է եղել ծառայությունից՝ կարգապահական խնդիրների պատճառով: Բայց ինչ էլ լինի, նա ԼՂՀ քաղաքացի է, եւ մենք պայքարելու ենք նրա իրավունքների համար»,- վստահեցրեց Յուրի Հայրապետյանը:
Օմբուդսմենը նաեւ ուշադրություն հրավիրեց այն հանգամանքի վրա, որ, դատելով մամուլում հայտնված հրապարակումներից, լրագրողներին թույլ չեն տվել մասնակցել դատավարությանը: Դրանցում չի նշվում նաեւ պաշտպանի մասին:
«Ի հակադրություն հիշեցնեմ, որ Ադրբեջանի քաղաքացիների դատավարությունը ԼՂՀ-ում անցել է բաց, թափանցիկ եւ հրապարակային: Դատավարությանն առանց որեւէ սահմանափակման մասնակցել են լրատվամիջոցների եւ միջազգային կազմակերպությունների ներկայացուցիչներ: Ես անձամբ հանդիպել են նրանց հետ, առանձին-առանձին զրուցել յուրաքանչյուրի հետ: Օմբուդսմենի գրասենյակի ներկայացուցիչները մասնակցել են դատական բոլոր նիստերին»,- հավելեց Յուրի Հայրապետյանը:
Նրա խոսքով, ներկայում ԼՂՀ մարդու իրավունքների պաշտպանի աշխատակազմը քննարկում է այն քայլերը, որոնք կոչված են միջազգային հանրության ուշադրությունն առավելագույնս ուղղել Արսեն Բաղդասարյանի իրավունքների խախտմանը: Իսկ թե հատկապես ինչ քայլեր կձեռնարկվեն, կհաղորդվի առաջիկայում:
Հիշեցնենք, որ շինծու գործով Բաղդասարյանին մեղադրել են դիվերսիա իրականացնելու մեջ եւ դատապարտել 15 տարվա ազատազրկման: Արսեն Բաղդասարյանի նկատմամբ Ադրբեջանի իշխանությունների գործողությունները պատասխանն էին Ադրբեջանի երկու քաղաքացիների՝ Դիլհամ Ասկերովի եւ Շահբազ Գուլիեւի ձերբակալության եւ դատավարության, որոնք ձերբակալվել էին զենքը ձեռքին եւ դատաքննության ընթացքում չէին հերքել մեղքը: Ադրբեջանցի ձերբակալված դիվերսանտներն ու ձերբակալության ժամանակ նրանց սպանված ընկերը՝ Հասան Հասանովը, երկու մարդու կյանք էին խլել, այդ թվում՝ մեկ դեռահասի, ինչպես նաեւ վիրավորել մեկ կնոջ:
Արսեն Բաղդասարյանի գործը միջազգային մարդասիրական իրավունքի կոպիտ խախտում դարձավ. ձերբակալությունից հետո մեկուկես ամիս շարունակ Կարմիր Խաչի միջազգային կոմիտեի ներկայացուցիչներին թույլ չէին տալիս այցելել նրան: Արսեն Բաղդասարյանը գերեվարվել է 2014 թվականի դեկտեմբերի 26-ին: