Միջերկրական ծովում հերթական նավի խորտակման հետեւանքով առնվազն 40 մարդ է զոհվել: Նրանք նույնպես փորձում էին Աֆրիկայից հասնել Իտալիայի ափերին:
Մայիսի 5-ին Zeran առեւտրային նավով 194 մարդու հասցրել են Կատանիա (քաղաք-նավահանգիստ Սիցիլիայում): ՌԻԱ Նովոստիի փոխանցմամբ, նրանց փրկել են Լիբիայից Իտալիա ուղեւորվող երկու նավակից:
Սիցիլիա ժամանած ներգաղթյալները Save the Children բարեգործական կազմակերպության աշխատակիցներին պատմել են, որ մինչեւ իրենց օգնության հասնելը երկու փչովի նավակներից մեկը սկսել է խորտակվել եւ մի քանի տասնյակ մարդ ջրում է հայտնվել:
«Նավակում ինչ-որ խնդիր է եղել: Հնարավոր է՝ պայթյուն է տեղի ունեցել, եւ մի քանի տասնյակ մարդ ծովն է ընկել: Նախնական տվյալների համաձայն, խոսքն ավելի քան 40 զոհի մասին է, բայց անհրաժեշտ է ստուգել այս տեղեկությունները»,- կազմակերպության ներկայացուցիչ Ջովաննա Դի Բենեդետտոյի խոսքերն է մեջբերում La Repubblica-ն: