Հայաստանի խորհրդարանական ընդդիմությունը, ըստ էության, խանգարում է հայրենիքից հեռու աշխատողների հայրենասիրությանը: Այս մասին Հայաստանի Ազգային ժողովում հայտարարեց ՀՀԿ պատգամավոր Վարդան Այվազյանը:
Օրինագծի համաձայն, արտերկրում, սակայն հայկական կազմակերպությունում աշխատող Հայաստանի քաղաքացիներն իրավունք ունեն եկամտահարկը Հայաստանի բյուջեին վճարել: Այս դրույթը գործում է այն երկրների պարագայում, որոնց հետ Հայաստանը կրկնակի հարկումը կանխելու մասին համաձայնագիր ունի: Ի դեպ, Հայաստանը նման համաձայնագիր ունի իր հիմնական տնտեսական բոլոր գործընկերների հետ:
Նման համաձայնագրերը նախատեսում են, որ, հայկական եւ արտասահմանյան հարկերի միջեւ տարբերության դեպքում, հարկավոր է վճարել արտասահմանյանը: Հիմնականում այդ պատճառով էլ, ըստ Այվազյանի, հարկի նոր դրույքաչափ է սահմանվել 13%-ը՝ ռուսաստանյան ֆիզիկական անձանց եկամտահարկի չափով:
«Մենք ասում ենք՝ թող արտերկրում բնակվող հայը հայրենասիրական մոտեցում ցուցաբերի եւ հարկը հայաստանյան բյուջեին վճարի: Իսկ դուք ասում եք՝ ոչ, թող չվճարի: Իսկ հետո ասում եք՝ հայրենասիրություն: Որտե՞ղ է ձեր հայրենասիրությունը»,- հայտարարեց Այվազյանը:
