Թուրքիայի վարչապետ Ահմեդ Դավութօղլուն, անդրադառնալով աշխարհի տարբեր երկրներում Ցեղասպանության ճանաչման թեմային, հայտարարել է, թե իրենք իրենց պապերի պես պայքարելու են ու չեն խոնհարվելու։
Թուրքական yesiligdir կայքի փոխանցմամբ՝ Թուրքիայի իշխող «Արդարություն եւ զարգացում» կուսակցության առաջնորդ, վարչապետ Ահմեդ Դավութօղլուն Իգդիրում կազմակերպված նախընտրական հանրահավաքի ժամանակ անդրադարձել է նաեւ Հայոց ցեղասպանության թեմային։
Դավութօղլուն հայտարարել է, թե Ցեղասպանության «պնդումներով» Թուրքիային նեղել ցանկացողները թող գան Իգդիրի հրապարակ եւ լսեն իրեն։ «Մենք խոսում ենք մեր պատմությունից, կիսում ենք ցավը։ Բայց մեր պապերի պես պայքարելու ենք ու գլուխ չենք խոնարհելու մեզ նեղել ցանկացողների առջեւ։ Մենք խաղաղության ճամփորդներ ենք։ Աշխարհում խաղաղության ճամփորդներ»,-ասել է Դավութօղլուն։
