Իրաքի Շանգալ նահանգում, «Իսլամական պետության» զինյալները 6000 եզդի գերիներից առանձնացրել են մոտ 600 գերու եւ սպառնում են սպանել նրանց: Այս մասին, այսօր` մայիսի 6-ին, լրագրողների հետ զրույցում ասաց «Միդիա-Շանգալ» եզդիների ազգային միավորում ՀԿ նախագահ Ամո Շարոյանը` հավելելով, որ եզդի ժողովրդի ցեղասպանությունը շարունակվում է:
«Ականատեսների պատմելով, ԻՊ-ի հրեշները Մոսուլ քաղաքի մոտակայքում առանձնացրել են շուրջ 500-600 գերիների եւ սպառնում են նրանց սպանել, որպեսզի «պատժեն» գերությունից փախած եզդիներին»,-ասաց նա:
Շարոյանի խոսքով` ԻՊ անդամները գերի վերցրած եզդի կանանց ու երեխաներին տանում են շուկա վաճառելու: Ճանապարհին գեիներին հաջողվում է փախչել, կամ էլ եզդիների ջոկատներն են կարողանում փրկել նրանց. «Կանանց ու երեխաներին, երբ տանում են շուկա, ճանապարհին եզդիական ջոկատները փորձում են ազատել նրանց, մեկ շաբաթվա ընթացքում կարողացել են ազատել 197 գերու»:
Եզդիների սպանությանն ականատես Մոսուլ քաղաքի հոգեւորական Ֆախիր Քամալը, որն Երեւանում է, Հայաստանի իշխանություններին խնդրելու օգնել եզդի ժողովրդին, նշեց, որ Իրաքում եզդիների հետ կատարվածը 1915թ. նույն Ցեղասպանությունն է.
«Ոչնչով չի տարբերվում Հայոց ցեղասպանությունից, նրանք մեզ սպանում են, որովհետեւ մուսուլման չենք ու չենք ընդունում իրենց կրոնը»,-նշեց Քամալը: