«Հայփոստ» ՓԲԸ-ն, մայիսի 6-ին, Վաշինգթոնում, ԱՄՆ Կոնգրեսի գրադարանում մարել է «Հայոց ցեղասպանության հարյուրամյա տարելից. Հենրի Մորգենթաու» թեմայով մեկ նամականիշ եւ «Հայոց ցեղասպանության 100-րդ տարելից. «Մերձավոր Արեւելքի ամերիկյան նպաստամատույց կոմիտե» թեմայով գեղաթերթիկ` մեկ նամականիշով:
Նամականիշերի մարումն իրականացրել են ՀՀ նախագահի աշխատակազմի ղեկավար Վիգեն Սարգսյանը, ԱՄՆ-ում ՀՀ արտակարգ եւ լիազոր դեսպան Տիգրան Սարգսյանը եւ «Հայփոստ» ՓԲԸ կոմերցիոն զարգացման տնօրեն Նարինե Սեֆերյանը:
Մարումն իրականացվել է Հայաստանի Հանրապետության նախագահ Սերժ Սարգսյանի եւ Ն.Ս.Օ.Տ.Տ. Ամենայն Հայոց Կաթողիկոս Գարեգին Բ.-ի ներկայությամբ:
Հենրի Մորգենթաուն 1913–16 թթ.-ին ԱՄՆ-ի դեսպանն էր Թուրքիայում, Առաջին աշխարհամարտի սկսվելուց հետո Օսմանյան կայսրությունում ներկայացրել է նաեւ Մեծ Բրիտանիայի, Ֆրանսիայի, Ռուսաստանի, Իտալիայի, Բելգիայի շահերը։
Մորգենթաուի հոդվածները եւ գրքերն արժանահավատ վկայություններ են Հայոց ցեղասպանության մասին։ Նա մերժել է ռազմական անհրաժեշտությամբ հայերի տեղահանության թուրքական վարկածը եւ ապացուցել, որ երիտթուրքական պարագլուխների նպատակը հայ ազգի իսպառ ոչնչացումն էր։
Հենրի Մորգենթաուի նախաձեռնությամբ է ստեղծվում Մերձավոր Արեւելքում ամերիկյան օգնության կոմիտեն` Ամերկոմը ( American Committee for Relief in the Near East, ACRNE), որը հիմնադրվել է 1915 թ., Մերձավոր Արեւելքի երկրների՝ պատերազմից տուժած եւ կարիքավոր բնակչությանը (հայեր, հույներ, ասորիներ եւ այլն) պարենով, հագուստով եւ դեղորայքով օգնելու նպատակով։
Արձագանքելով դեսպան Մորգենթաուի կոչին, որ անհրաժեշտ է Մերձավոր Արեւելքի կարիքավոր բնակչությանը անհապաղ օգնություն տրամադրել, ստեղծվում է մի հատուկ կոմիտե, որը ստանում ԱՄՆ պաշտոնյաների, ներառյալ, նախագահ Վուդրո Վիլսոնի աջակցությունը: Կոմիտեն կարողացավ Պոլսում գտնվող ԱՄՆ դեսպանատան միջոցով գումար եւ հագուստ տրամադրել կարիքավորներին, որոնց օգնությունը բաշխվում էր շրջաններում գտնվող հյուպատոսների եւ միսիոներների միջոցով: Մոտավոր հաշվարկով տրամադրվել է 117 միլիոն ԱՄՆ դոլարի օգնություն: Նպաստամատույց կոմիտեի գործունեության շնորհիվ փրկվել են տարածաշրջանով սփռված 132 000 հայ որբեր:
Նամականիշի վրա պատկերված է «Չթողնենք, որ կործանվեն» Մերձավոր Արեւելքի ամերիկյան նպաստամատույց կոմիտեի հանգանակության պաստառը` Ամերիկային շնորհակալություն հայտնող որբերի խորապատկերին:
«Հայոց ցեղասպանության հարյուրամյա տարելից. Հենրի Մորգենթաու»
(1 փոստային նամականիշ)
Թողարկման օրը` 06 մայիսի, 2015թ.
Դիզայնը՝ Վահագն Մկրտչյան, Հայկ Դեմոյան
Տպարանը` Lowe Martin Group, Կանադա
Չափսերը` 30,0 x 40,0 մմ
Տպաքանակը՝ 50 000
Հայոց ցեղասպանության 100-րդ տարելից
Մերձավոր Արեւելքի ամերիկյան նպաստամատույց կոմիտեի 100-ամյակը
(գեղաթերթիկ 1 նամականիշով)
Թողարկման օրը` 06 մայիսի 2015թ.
Դիզայնը՝ Խուան Պաբլո Գեչիդջյան, Վահագն Մկրտչյան, Հայկ Դեմոյան
Տպարանը` Cartor, Ֆրանսիա
Նամականիշի չափսերը` 26,0 x 40,0 մմ
Գեղաթերթիկի չափսերը` 70,0 x 90,0 մմ
Տպաքանակը՝ 20 000