ԵԱՀԿ Մինսկի խմբի համանախագահները Լեռնային Ղարաբաղում ընտրությունների վերաբերյալ միշտ երկիմաստ հայտարարություններ են արել։ Սակայն այս անգամ արձագանքը բոլորովին այլ էր։ Այս մասին մայիսի 7-ին կայացած մամուլի ասուլիսի ժամանակ հայտարարեց Հայաստանի առաջին օմբուդսմեն, «Իրավական կամայականությունների դեմ» ՀԿ-ի գործադիր տնօրեն Լարիսա Ալավերդյանը՝ հավելելով, որ այդ հարցում դրական տեղաշարժ կա։
Նրա համոզմամբ՝ Լեռնային Ղարաբաղում անօրինական ընտրությունների մասին խոսելը նոնսենս է. չի կարելի լեգիտիմություն հասկացությունը զրկել արժեքից։ Ալավերդյանի կարծիքով՝ ղարաբաղյան հակամարտության կարգավորման բանակցային գործընթացը կմնա առանց առաջընթացի։ «Անցկացվող հանդիպումներն անգամ առաջընթացի միտում այլեւս չունեն։ Ադրբեջանի համար փետրվարից մայիս ընկած ժամանակահատվածը սադրանքների ակտիվացման շրջան է»,- փաստեց Հայաստանի առաջին օմբուդսմենը։
Լարիսա Ալավերդյանը նաեւ հավելեց, որ Ադրբեջանի հետընթացը վատ է անդրադառնում տարածաշրջանի վրա, քանի որ այդ ազգի մոտ ագրեսիվության մակարդակը բարձրանում է։