Մշակույթի նախարարության գերակա ուղղությունը 2015թ. լինելու է թատերական արվեստը։ Այս մասին այսօր՝ մայիսի 16-ին, լրագրողներին ասաց ՀՀ մշակույթի նախարար Հասմիկ Պողոսյանը՝ նշելով, որ նախորդ տարի գերակա ուղղությունը եղել է երգչախմբային արվեստը:
«Նախորդ տարի լուրջ գիտական աշխատություններ են հրատարակվել Կոմիտասի մասին: Ինչ վերաբերում է թատերական արվեստին, ապա այս գերակա ուղղության շրջանակում լայնածավալ աշխատանքներ են նախատեսված»,-ասաց նա:
Անդրադառնալով մշակութային կրթական ոլորտի ծրագրերին՝ Հասմիկ Պողոսյանն ասաց, որ այս տարի ամփոփում են 2012-2015թթթ պետական ծրագիրը, և կազմելու են նոր ծրագիր՝ հետագա տարիների համար:
«2012-2015 թվականների համար նախատեսված 22 կետը դառնալու է 40 կետ, և միջազգային հարթակներում մեր երեխաների հաջողությունները հենց այդ գործողությունների արդյունքն է լինելու»,-ասաց նա:
Նախարարը նաեւ անդրադարձավ մշակութային ենթակառուցվածքների խնդրին՝ նշելով, որ այն ցավոտ հարց է, քանի որ լուրջ ֆինանսական ներդրումներ է պահանջում:
«Արդեն կառուցվել է Մաշտոցի անվան մատենադարանի նոր մասնաշենքը, Հայոց ցեղասպանություն ինստիտուտ-թանգարանի նոր մասնաշենքը, Կոմիտասի թանգարանը: Կան երկու նոր նախագծեր, զուգահեռաբար ընդլայնվում են այն թանգարանները, որոնք գոյություն ունեն, բացվելու է Համո Սահյանի տուն թանգարանը: Զուգահեռաբար ընդլայնվում է նաև մասնավոր թանգարանների հետ համագործակցությունը»,-ասաց նա:
