Թուրքիան պետք է ճանաչի հայ ժողովրդի հանդեպ իրագործած սխալները, ինչպես դա արեց Գերմանիան հրեաների ցեղասպանության՝ Հոլոքոստի դեպքում: Այս մասին NEWS.am-ի թղթակցի հետ զրույցում հայտարարեց Կիպրոսի Կրթության եւ մշակույթի նախարարության մշտական քարտուղար Էգլի Պանտելակիսը:

Այս տարի լրացավ Հայոց ցեղասպանության 100-րդ տարելիցը: Ինչպե՞ս կգնահատեք այդ հարցի շուրջ Թուրքիայի քայլերը: Հայաստանի եւ Թուրքիայի հաշտեցման գործընթացի վերականգնման հեռանկարներ տեսնո՞ւմ եք:

Հայտնի է, որ Թուրքիան հարեւան երկիր է ինչպես Հայաստանի, այնպես էլ Կիպրոսի համար: Եվ մենք իրականում կցանկանայինք լավ հարաբերություններ ունենալ այդ երկրի հետ: Սակայն, մյուս կողմից, մենք պետք է հետեւենք առանձին արժեքների: Օրինակ՝ կիպրական խնդրի դեպքում մենք պետք է համաձայնության հասնենք Թուրքիայի հետ, բայց դա պետք է հավասարակշռված, արդյունավետ եւ արժեքավոր որոշում լինի: Հետեւաբար, Թուրքիան պետք է ընդունի հայ ժողովրդի հանդեպ իրականացրած սխալները, ինչպես դա արեց Գերմանիան հրեաների ցեղասպանության պարագայում, ներողություն խնդրի, խոստանա, որ նման բան այլեւս չի կրկնվի: Եվ եթե դա տեղի ունենա, ապագայում Հայաստանի եւ Թուրքիայի հարաբերությունները կարող են բարելավվել:

Հաշվի առնելով Թուրքիայի կողմից Հյուսիսային Կիպրոսի բռնագրավումը, հավատո՞ւմ եք, որ Թուրքիան պատրաստ է իրականացնել Ձեր նշած քայլերը:

Չնայած անցյալին, պետք չէ կորցնել հույսը: Այսպես կոչված, Կիպրոսի «հյուսիսային հանրապետությունում» վերջերս ընտրություններ կայացան, եւ թուրք կիպրացի շատ լավ գործիչ պետության ղեկավար ընտրվեց: Նա ընթրեց մեր նախագահի հետ, եւ պայմանավորվածություն ձեռք բերվեց շատ շուտով բանակցությունները վերսկսելու մասին: Բոլորս ցանկանում ենք հավատալ, որ Թուրքիան անհրաժեշտ կամք եւ ճկունություն կդրսեւորի՝ հարցին արդարացի լուծում գտնելու համար: Իհարկե, դա դյուրին չէ: Բայց ապագայի համար այլ ճանապարհ չկա:

Համաշխարհային հանրությունն ի՞նչ պետք է ձեռնարկի Հայոց ցեղասպանության հարցի առնչությամբ: Չե՞ք կարծում, որ Թուրքիայի վրա միջազգային հանրության ճնշումները բավարար չեն, որպեսզի վերջինն առերեսվի սեփական պատմության հետ:

Միջազգային հանրության կողմից ավելի ուժեղ ճնշում է հարկավոր, որպեսզի Թուրքիան, որը լավ տեղեկացված է, որ աշխարհի բազմաթիվ երկրներ ճանաչել են Հայոց ցեղասպանությունը, ինքն էլ ընդունի իրականացրած հանցագործությունը:

Զրուցեց՝ Տաթեւիկ Ղազարյանը