Հայաստանի եւ Եվրոպայի խորհրդի միջեւ համագործակցությունը կարեւոր է երկրում անցկացվող բարեփոխումների համար։ Այս մասին մայիսի 19-ին ԵԽԽՎ իրավական հարցերի և մարդու իրավունքների հանձնաժողովի նիստում հայտարարել է ԱԺ խոսնակ Գալուստ Սահակյանը։ Նիստը ընթանում է Ազգային ժողովում։
«Հայաստանի եւ Եվրոպայի խորհրդի միջեւ համագործակցությունը եվրոպական արժեքների եւ պատմական ընդհանրության վրա հիմնված քաղաքականության արտահայտումն է։ Մենք պարտավորություն ենք ստանձնել ամրացնել ժողովրդավարական ինստիտուտներն ու ապահովել իրավունքի գերակայությունը։ Եվրոպայի խորհրդի հետ համագործակցությունը երկրում բարեփոխումների հաջող իրականացման կարեւոր գործոնն է»,- ասել է Սահակյանը։ Նրա խոսքով՝ Հայաստանը առաջընթաց է գրանցել կառավարման համակարգում, տնտեսական զարգացման ոլորտում եւ կաշառակերության դեմ պայքարում։ Հանրապետությունում քաղաքացիական հասարակությունն ու ազատ մամուլը կայուն դիրքեր են զբաղեցնում։ «Մենք շարունակում ենք աշխատել այդ ուղղությամբ»,- վստահեցրեց ԱԺ խոսնակը։
