Եվրոպայի Հայ դատի հանձնախումբը Եվրոպայում բնակվող թուրքերին կոչ է անում հունիսի 7-ին Թուրքիայում նախանշված խորհրդարանական ընտրություններին քվեարկել Ազգերի դեմոկրատական կուսակցության օգտին: Այս մասին գրում է «Asbarez»-ը:
«Եվրոպայի Հայ դատի հանձնախմբի կողմից Ազգերի դեմոկրատական կուսակցությանն աջակցությունը հիմնված է փոխադարձ հետաքրքրություն ներկայացնող բազմաթիվ հարցերի շուրջ ընդհանուր արժեքների եւ մոտեցումների վրա: Կարծում ենք, որ այդ կուսակցությունը Թուրքիայում առաջատար ուժ է, որն ակտիվորեն պայքարում է մայրենի լեզվի, մշակույթի, կրոնական համոզմունքների եւ ծագման շուրջ ազգերի իրավունքների համար»,- ասված է կազմակերպության հայտարարությունում:
Եվրոպայի Հայ դատի հանձնախումբը մշտական երկխոսություն ունի Ազգերի դեմոկրատական կուսակցության հետ՝ դրա ստեղծումից ի վեր, եւ ողջունում է այդ կուսակցությունից ազգությամբ հայ մի քանի թեկնածուների առաջադրումը: Հայտարարությունում կազմակերպությունը հույս է հայտնել, որ թուրքական իշխանություններն ազատ եւ արդար ընտրարշավ եւ ընտրություններ կապահովեն, ինչպես նաեւ նշել, որ ուշադիր հետեւում է իրադարձությունների ընթացքին:
