Եվրամիությունը հավատարիմ է մամուլի ազատության եւ մարդու իրավունքների պաշտպանությանը, դա կասկածից վեր է։ Այս մասին մայիսի 19-ին, անդրադառնալով Ադրբեջանում մարդու իրավունքների եւ մամուլի ազատության շուրջ տիրող իրավիճակի մասին լատվիացի լրագրողի հարցին, հայտարարել է Եվրամիության բարձրաստիճան մի պաշտոնյա, որը ցանկացել է անհայտ մնալ։
Նրա խոսքով՝ ԵՄ-ի եւ Ադրբեջանի միջեւ համագործակցությունը ներառում է ոչ միայն տնտեսական շահը, այլ նաեւ օրենքի գերակայությունը, բազմակարծությունը, հիմնարար ազատությունների երաշխիքները։ «Դա նույնպես «Արեւելյան գործընկերության» ծրագրի հիմնարար բազան է։ Այդ հարցերը բարձրացվում են Ադրբեջանի եւ Եվրամիության միջեւ բոլոր պաշտոնական միջոցառումների ժամանակ»,- վստահեցրել է պաշտոնյան։