Իրանական գազը Եվրոպա տանելու լավագույն ուղին Հայաստանն է։ Այս մասին մայիսի 19-ին ԱԺ-ում հայտարարեց Հանրապետական կուսակցության պատգամավոր Վահրամ Մկրտչյանը։ Նա նշեց, որ Իրանի դեմ պատժամիջոցները հանելուց հետո տարածաշրջանում նոր աշխարհաքաղաքական իրավիճակ կստեղծվի, որը կազդի նաեւ Հայաստանի վրա։
«Նախագահ Սերժ Սարգսյանը ժամանակին հայտնեց Հայաստանի դիրքորոշումը։ Մարտի վերջին՝ Չինաստան կատարած այցի ժամանակ, նախագահը չինացի գործարարներին կոչ արեց ներդրումներ կատարել Իրան-Հայաստան երկաթուղու շինարարության մեջ։ Եվ վերջերս ԵՏՀ Գերագույն խորհրդի նիստում նախագահը հայտարարեց ԵՏՄ-ի եւ Իրանի միջեւ համագործակցության ընդլայնման անհրաժեշտության մասին եւ ուշադրություն հրավիրեց ԵՏՄ-ն Հարավարեւելյան Ասիային եւ Պարսից ծոցին կապող ենթակառուցվածքների վրա։
Եթե հայացք գցենք իրանական գազը Եվրոպա տանելու հնարավոր ուղիների վրա, ապա ամենահավանական ուղին Հայաստանն է։ Իրանի եւ Թուրքիայի տարաձայնությունների, ինչպես նաեւ Ադրբեջանի հետ էթնիկ հարցերում Իրանի ունեցած բարդ հարաբերությունների մասին հայտնի է։ Նշանակում է, որ եթե Իրանը մեզ համար պատուհան է դեպի Ասիա, ապա հիմա մենք կարող ենք Իրանի համար պատուհան դառնալ դեպի Եվրոպա»,- հայտարարեց Մկրտչյանը։
