Էլեկտրաէներգիայի սակագնի բարձրացման դեմ պայքարող «Ոչ թալանին» քաղաքացիական նախաձեռնությանը կարող է միանալ ցանկացած անձ՝ միայն որպես ՀՀ քաղաքացի։ Այս մասին այսօր՝ մայիսի 20-ին, լրագրողներին ասաց նախաձեռնության անդամ Մաքսիմ Սարգսյանը։
Նրա խոսքով՝ սա քաղաքացիների պայքար է, ոչ թե կուսակցությունների համար PR քայլ։
«Մենք ազատ ենք, բաց ենք ցանկացած քաղաքացու համար, որը ցանկանում է միանալ մեզ սակայն միայն որպես Հայաստանի Հանրապետության քաղաքացի, ոչ թե կուսակցության անդամ։ Մեր պայքարը քաղաքացիական է, ոչ թե կուսակցական»,- ասաց ակտիվիստը՝ չբացառելով, որ մայիսի 27-ին նախատեսված երթին եւ հետագա ակցիաների ժամանակ կլինեն քաղաքական գործիչներ, պատգամավորներ։
Նշենք, որ մայիսի 27-ին ժամը 19:00-ին նախատեսվում է խաղաղ երթ։
Հիշեցնենք, որ ՀԷՑ-ը դիմել է Հանրային ծառայությունների կարգավորող հանձնաժողովին՝ հոսանքի սակագինը, նախնական մոտ 16 դրամով բարձրացնելու համար։ Հոսանքի թանկացմանը կհաջորդի առաջին անհրաժեշտության ապրանքների թանկացումը, որը մեծ հարված կլինի ցանկացած ՀՀ քաղաքացու գրպանին։
