Այլընտրանքային երկու էներգակիրների՝ էլեկտրաէներգիայի եւ բնական գազի սակագները շարունակում են աճել: Երբեմն՝ առանձնաբար, իսկ երբեմն՝ երկուսը միասին:
Դեռեւս 2008 թվականի հուլիսին «Հայաստանի էլեկտրական ցանցեր» ընկերության այն ժամանակվա ղեկավարը, մեկնաբանելով էլեկտրաէներգիայի հնարավոր թանկացման մասին լուրերը, հայտարարեց, որ դրա սակագինն «առանց այդ էլ բարձր է»: Այդ ժամանակից 7 տարի է անցել, եւ միջին սակագինն աճել է գրեթե 1.8 անգամ:
Հասկանալի է, որ էլեկտրաէներգիայի սպասվող թանկացումն ուղղակիորեն կհարվածի Հայաստանի բազմաթիվ ընտանիքների բյուջեին: Ընդ որում, նրանց վնասը կրկնակի կլինի: Հայտնի է, որ ժամանակակից կենցաղային էներգախնայող սարքավորումները միջինը 20%-ով ավելի քիչ էլեկտրաէներգիա են ծախսում, քան խորհրդային ժամանակներինը: Սակայն այդպիսի տեխնիկան ոչ բոլորի գրպանին է հարմար: Շատերը մինչեւ հիմա շարունակում են հնագույն ժամանակների սառնարաններ եւ լվացքի մեքենաներ օգտագործել, «հին» գաղօջախներ, որոնք բառացիորեն խժռում են հոսանքը:
Հայաստանի Ազգային վիճակագրական ծառայության տեղեկատվության համաձայն, 2008-2013 թվականներին ընտանիքների էլեկտրաէներգիայի ծախսն աճել է գրեթե 1.6 անգամ, բնական գազինը՝ 1.7 անգամ: Արդյունքում, ընտանեկան բյուջեում այդ երկու էներգակիրների համատեղ մասնաբաժինը 7.9%-ից հասել է 10.1%-ի: Սակայն ծախսերի աճը տեղի է ունեցել այդ էներգակիրների օգտագործման կրճատման ֆոնին:
Այս տարիներին էլեկտրաէներգիայի օգտագործումը կրճատվել է 1%-ով, իսկ ահա բնական գազինը՝ 36.5%-ով: Նկատենք, որ այս տվյալներն արտացոլում են մեր հանրության միջին եւ աղքատ դասի վիճակը:
Նույն ժամանակահատվածում քաղաքացիները զանգվածայնորեն անցել են «էժան» փայտին, որի ծախսն աճել է ավելի քան 2.5 անգամ: Հասկանալի է, որ էլեկտրաէներգիայի հերթական թանկացումը կհանգեցնի բազմաթիվ ընտանիքներում դրա հետագա օգտագործման կրճատման, միաժամանակ կրկին կավելանա փայտի պահանջարկը:
