Գորիսի քաղաքապետի նախկին թեկնածու, «ԳԱՄՄԱ» գործարանի տնօրեն Տիգրան Կարապետյանը երեկ ուշ երեկոյան հարցաքննվել է: NEWS.am-ի այս տեղեկությունը հաստատեց գործարարը:
Նա հայտնեց, որ իրեն հարցաքննության են կանչել Սյունիքի մարզպետ Սուրիկ Խաչատրյանի մեքենայի ուղղությամբ արձակված կրակոցների առթիվ հարուցված քրեական գործի շրջանակում:
Հարցաքննությունից մանրամասներ գործարարը չհայտնեց:
Նշենք, որ Տիգրան Կարապետյանը լարված հարաբերություններ ունի Սուրիկ Խաչատրյանի հետ: Վերջինիս նշանակումից անմիջապես հետո գործարարը հայտարարել էր, որ այլեւս ներդրումներ չի կատարելու Գորիսում:
Ավելի վաղ NEWS.am-ը հայտնել էր, որ Կապան-Գորիս ճանապարհին 2015թ. մայիսի 20-ին կրակել են Սյունիքի մարզպետ Սուրիկ Խաչատրյանի մեքենայի ուղղությամբ։ NEWS.am-ի տեղեկությունը հաստատել էր Սյունիքի մարզպետի խորհրդական Զարզանդ Նիկողոսյանը՝ հավելելով, որ տուժողներ չկան: Ժամեր անց Քննչական կոմիտեն մամուլի հաղորդագրություն էր տարածել՝ նշելով, որ ՀԿԳ քննչական գլխավոր վարչության վարույթում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի եւ 235-րդ հոդվածի 1-ին մասի հատկանիշներով:
