Հայաստանի ԱԳ նախարար Էդվարդ Նալբանդյանն ու խորհրդարանի պատգամավորների պատվիրակությունը առաջիկայում կմեկնեն Սիրիա։ Այդ մասին կառավարության նիստում հայտնել է սփյուռքի նախարար Հրանուշ Հակոբյանը։
Նրա խոսքով, պատվիրակությունը տեղում կծանոթանա Սիրիայում ապրող հայերի վիճակին եւ կպարզի, թե ինչ կարգի օգնություն կարող են ցուցաբերել։ Այժմ, ըստ նախարարի, Հալեպի բնակիչների վիճակը փոքր-ինչ կարգավորվել է, վերականգնվել է էլեկտրականության եւ ջրի մատակարարումը։ Հայերի որոշ քանակություն որոշել է չլքել քաղաքը՝ չնայած բոլոր դժվարություններին։ Մյուս մասը տեղափոխվել է Սիրիայի ավելի անվտանգ շրջաններ։
Վերջին օրերին ԻՊ-ն գնդակոծում է Դամասկոսն ու Պալմիրա հնագույն քաղաքը։ «Դամասկոսում հայեր համեմատաբար քիչ են ապրում, բայց իրավիճակը, բնականաբար, մեզ մտահոգում է»,- ասել է Հակոբյանը։