Թուրքիայի քրդական «Ժողովուրդների դեմոկրատական» (HDP) կուսակցության հայտնի պատգամավորներից Ալթան Թանն իր ելույթում կրկին շեշտել է, որ 1915-ին հայերի դեմ ցեղասպանություն է տեղի ունեցել։

Թուրքական Arca գործակալության փոխանցմամբ՝  HDP-ի պատգամավոր Ալթան Թանը կուսակցության Բուրսայի նահանգային գրասենյակում կազմակերպված մամուլի ասուլիսի ժամանակ անդրադարձել է Թուրքիայում նախընտրական զարգացումներին՝ դատապարտելով քրդական կուսակցության դեմ շարունակական հարձակումները։

Լրագրողներից մեկի հարցին, կապված 1864-ին չերքեզների կոտորածի թեմային, Ալթան Թանը պատասխանել է. «Այս տարածաշրջանում մեծ ողբերգություններ են տեղի ունեցել։ Օրինակ՝ ապրիլի 24-ին խոսում էինք Հայոց ցեղասպանության մասին։ Հայոց ցեղասպանությունը երբեք չի մոռացվի, այնպես էլ չեն մոռացվի Կովկասում եւ Բալկաններում տեղի ունեցած կոտորածները»։