ԱՄՆ իշխանությունները հրապարակել են հարցաթերթիկը, որը կամավորները լրացնում են «Ալ Քաիդա» ահաբեկչական խմբավորմանն անդամակցելիս: Այն նման է անձնագիր, վիզա եւ այլ փաստաթղթեր ստանալու համար լրացվող հարցաթերթիկներին, սակայն որոշ հարցեր նման թերթիկներում չկան:
Բացի անձնական տվյալների մասին ստանդարտ հարցերից, «Ալ Քաիդա»-ին անդամակցության թեկնածուները պետք է նշեն իրենց ազգականներին, ներառյալ՝ պապիկներին: Նրանց նաեւ հարցնում են, թե որքան ժամանակ են պատրաստվում զբաղվել ջիհադով, եւ ինչու են որոշել «սրբազան պատերազմի» ուղին ընտրել:
Կամավորներին հարցնում են, թե ինչ ունակություններ ունեն, քանի լեզվի են տիրապետում, Ղուրանի որ հատվածն են անգիր հիշում:
Ահաբեկչության թեկնածուները նաեւ պետք է պատմեն, ճամփորդում են իրակա, թե՞ կեղծ անձնագրով, արդյո՞ք ազատազրկման են դատապարտվել, պատրա՞ստ են մահապարտ դառնալ, ինչպես նաեւ առաջարկում են ներկայացնել որեւէ անձի տվյալներ, որին կհաղորդեն նրա մահվան մասին:
Հարցաթերթիկում նշվում է, որ ներկայացված տեղեկությունը պետք չէ հաղորդել այլ անձանց, այլ միայն Ալլահին: