Հայաստանի նախագահ Սերժ Սարգսյանն ու Գերմանիայի կանցլեր Անգելա Մերկելն այսօր Ռիգայում կայացած հանդիպման ընթացքում քննարկել են հայ-գերմանական միջպետական հարաբերություններին վերաբերող հարցեր՝ գոհունակությամբ արձանագրելով, որ վերջին շրջանում նշանակալիորեն ընդլյանվել եւ հարստացել է հայ-գերմանական համագործակցության օրակարգը, որն ամրապնդվել է համագործակցության շուրջ վեց տասնյակ համաձայնագրով: Այս մասին NEWS.am-ը տեղեկացավ ՀՀ նախագահի մամուլի ծառայությունից:
Հանդիպման ընթացքում Սերժ Սարգսյանը երախտագիտություն է հայտնել Գերմանիայի կառավարության կողմից Հայաստանին ցուցաբերվող շարունակական աջակցության համար:
Հայաստանի նախագահը եւ Գերմանիայի կանցլերն անդրադարձել են Հայաստան-Եվրամիություն հարաբերություններին եւ զարգացման հեռանկարներին: Այդ հարաբերությունների խորացման գործում մեր երկրի ղեկավարը կարեւորել է ԵՄ-ում ծանրակշիռ դիրք ունեցող Գերմանիայի դերը:
Անդրադարձ է եղել նաեւ Հայոց ցեղասպանության 100-րդ տարելիցին, այդ կապակցությամբ Հայաստանում եւ աշխարհի բազմաթիվ երկրներում, այդ թվում՝ Գերմանիայում տեղի ունեցած հիշատակի եւ ոգեկոչման միջոցառումներին: Նախագահ Սերժ Սարգսյանը երախտագիտություն է հայտնել Գերմանիայի իշխանություններին՝ Հայոց ցեղասպանության դատապարտման հարցում արտահայտած դիրքորոշման համար:
Զրուցակիցները մտքեր են փոխանակել նաեւ Հարավային Կովկասի տարածաշրջանի խնդիրների եւ մարտահրավերների, այդ թվում՝ ԵԱՀԿ Մինսկի խմբի շրջանակում Լեռնային Ղարաբաղի հիմնախնդրի խաղաղ ճանապարհով կարգավորման բանակցային գործընթացի շուրջ: