Ռիգայում «Արեւելյան գործընկերության» համատեղ կոմյունիկեում ընդգծվելու է երկրների տարածքային ամբողջականության պահպանման կարեւորությունը։ Այս մասին մայիսի 22-ին՝ Ռիգայում «Արեւելյան գործընկերության» գագաթնաժողովի 2 –րդ օվա մեկնարկից առաջ, հայտարարել է Գերմանիայի կանցլեր Անգելա Մերկելը։
Նրա խոսքով՝ համաձայնություն է ձեռք բերվել, որ տարվա վերջում Եվրահանձնաժողովը նորից կգնահատի Վրաստանի եւ Ուկրաինայի համար անվիզա ռեժիմ սահմանելու հնարավորությունը։ «Ռիգայում խորհրդատվությունները ներդաշնակ են ընթանում, եւ մենք կարող ենք համաձայնության գալ համատեղ կոմյունիկեի շուրջ, որում ընդգծվում է, որ յուրաքանչյուր երկրի տարածքային ամբողջականությունը պետք է պաշտպանվի»,- ասել է Մերկելը, փոխանցում է ՏԱՍՍ-ը։
Մերկելը ընդգծել է, որ Ուկրաինան եւ Վրաստանը անվիզա ռեժիմի անցնելու համար պետք է մի շարք պայմաններ կատարեն։ «Հանձնաժողովը տարվա վերջում մեկ անգամ եւս կուսումնասիրի, թե որքանով են այդ միջոցները համապատասխան, եւ եթ այո, ապա կկազմենք անվիզա ռեժիմի հեռանկարը» ,- եզրափակել է Մերկելը։