Թուրքիայի իշխող «Արդարություն եւ զարգացում» կուսակցության առաջնորդ, վարչապետ Ահմեդ Դավութօղլուն Թոքաթ քաղաքում կազմակերպված նախընտրական հանրահավաքին նախագահ Էրդողանին վիրավորող արտահայտություններ է արել։
Թուրքական Sozcu-ի փոխանցմամբ՝ Թուրքիայի վարչապետ Ահմեդ Դավութօղլուն հանրահավաքում ելույթի ժամանակ սկսել է քննադատել ընդդիմադիր «Ժողովրդա-հանրապետական» կուսակցության (CHP) առաջնորդին՝ շեշտելով, որ նա գիրք չի կարդում եւ կարդալու տեսանկյունից «հաշմանդամ» է։
«Պարոն Քըլըչդարօղլուն իմ հեղինակած «Ռազմավարական խորություն գրքի համար ասել էր, թե ընդամենը ամփոփումն է (ռեզյումե) կարդացել։ Շատ ծիծաղելի է, երբեւէ գրքի ամփոփումը կարդո՞ւմ են»,-ասել է Դավութօղլուն՝ մոռանալով, որ Թուրքիայի նախագահ Ռեջեփ Թայիփ Էրդողանը եւս հայտարարել էր, որ գիրք չի կարդում, այլ ընկերները տրամադրում են գրքի ամփոփումը։