Հայոց ցեղասպանության զոհերի հիշատակին Բելգիայի խորհրդարանում լռության րոպեի ժամանակ պատգամավոր Էմիր Քիրի բացակայությունից եւ դրա շուրջ աղմուկից հետո, հիմա էլ բանավեճի կենտրոնում է հայտնվել բրյուսելցի պատգամավոր Ահմեդ Էլ Հանուսը, որը վիճելի հայտարարությամբ է հանդես եկել: Այս մասին հաղորդում է «RTL» հեռուստաընկերության կայքը:
Ահմեդ Էլ Հանուսը, որը թուրքական արմատներ չունի, վերջերս «Facebook»-ում գրել է Հայոց ցեղասպանության ճանաչման, ավելի ճիշտ՝ այն չճանաչելու մասին: Նա, մասնավորապես, գրել է. «Ցանկանում եմ իմ բողոքն արտահայտել այն մեղադրանքների առիթով, որոնց զոհ է դառնում Թուրքիան: Նախ բանավեճ առաջացավ Օսմանյան կայսրությունում իրականացված 1.5 հայերի զանգվածային սպանությունների մասին: Արդյո՞ք պետք է դա ցեղասպանություն որակել: Այդ հարցը ճեղք է առաջացնում նույնիսկ բելգիական դիվանագիտության կուլիսներում»:
Նրա մեկնաբանությունը բուռն արձագանք է առաջացրել: Որոշները նույնիսկ պատգամավորին մեղադրել են ժխտողականության մեջ: Ի պատասխան՝ նա ասել է, որ իրեն ճիշտ չեն հասկացել. «Ես իսկապես ցնցված եմ իմ էջի մեկնաբանությունից: Ինձ համար դա անտանելի է: Ես միշտ հստակ եմ արտահայտվել եւ միշտ ճանաչել եմ Հայոց ցեղասպանությունը: Կարծում եմ՝ պետք չէ առեւտուր անել այդ պատմական տառապանքների շուրջ»:
Նրա խոսքով, իր մեկնաբանություններում ինքն ընդամենը ցանկացել է դատապարտել այն, որ վերջին իրադարձությունների արդյունքում, այդ թվում՝ լռության րոպեի ժամանակ որոշ պատգամավորների բացակայության, շատերը սկսեցին խարանել Բելգիայի թուրքական հանրությանը: «Կարեւոր է անել հնարավոր ամեն ինչ՝ ժողովուրդներին մերձեցնելու համար»,- հավելել է Ահմեդ Էլ Հանուսը:
Հիշեցնենք, որ Սոցիալիստական կուսակցությունից պատգամավոր Էմիր Քիրը ու թուրքական ծագմամբ մի քանի այլ պատգամավորներ, այդ թվում՝ այլ կուսակցություններից, Բելգիայի խորհրդարանում Հայոց ցեղասպանության զոհերի հիշատակին լռության րոպեի ժամանակ բացակայել էին դահլիճից:
