Ռիգայի ամփոփիչ փաստաթղթի կապակցությամբ Ադրբեջանի եւ Բելառուսի դիրքորոշումը օրինակ է այն բանի, թե ինչպես պետք է մեր համագործակցությունը տարբերակված ձեւեր ստանա։ Այս մասին մայիսի 22-ին «Արեւելյան գործընկերության» գագաթնաժողովում կայացած մամուլի ասուլիսի ժամանակ հայտարարել է Եվրոպական Խորհրդի նախագահ Դոնալդ Տուսկը՝ պատասխանելով հռչակագրի ստորագրման գործընթացը Ադրբեջանի անհամաձայնության պատճառով ձգձգվելու մասին Wall Street Journal-ի թղթակցի տված հարցին։
Տուսկի խոսքով՝ անհատական մոտեցումը եղել է գագաթնաժողովի հիմնական թեման։ «Մեզ նոր գործիքներ են անհրաժեշտ թե՛ Եվրամիության, թե՛ «Արեւելյան գործընկերության» համար։ Սա Ադրբեջանի նախագահ Իլհամ Ալիեւի հետ իմ զրույցի հիմնական թեման է եղել։ Դա գագաթնաժողովից հետո էր։ Մենք խոսել ենք նոր գործիքների եւ նոր մոտեցումների մասին։ Ադրբեջանը տրամադրված է ԵՄ-ի հետ համագործակցության շարունակմանը եւ ամրապնդմանը, եւ Ալիեւը դա հասկացնել տվեց։
Ադրբեջանին պետք են Եվրոպայի հետ լավ հարաբերությունները։ Դրանում կասկած չկա։ Իսկ ինչ վերաբերում է հռչակագրի շուրջ առաջացած էմոցիաներին, իրավիճակը հեշտերից չէր։ Եղան շատ փոփոխություններ, սակայն մեր մտադրությունները չեն փոխվել։ Ես գոհ եմ գագաթնաժողովի արդյունքից՝ չնայած հռչակագրի տեքստի շուրջ ստեղծված բարդ իրավիճակին»,- եզրափակեց Դոնալդ Տուսկը։