Եվրամիությունը չի շեղվում իր ընտրած ճանապարհից. Ոչ ոք չի խոստացել, թե «Արեւելյան գործընկերությունը» ավտոմատ կերպով նշանակում է ճանապարհ դեպի ԵՄ։ Այս մասին մայիսի 22-ին «Արեւելյան գործընկերության» գագաթնաժողովում կայացած մամուլի ասուլիսի ժամանակ հայտարարել է Եվրոպական խորհրդի նախագահ Դոնալդ Տուսկը՝ պատասխանելով Ուկրաինայի, Մոլդովայի եւ Վրաստանի եվրոպական հեռանկարների ժամկետների մասին հարցին։
«Այս բարդ ժամանակներում դա հատկապես ճիշտ է. ես նկատի ունեմ մեր տարածաշրջանում տիրող աշխարհաքաղաքական իրավիճակը։ Մենք բոլորս պետք է շատ բաց լինենք։ ԵՄ-ն կատարում է իր խոստումները։ Մենք գործում ենք մեր խոստումների հիման վրա, եւ դրանք համապատասխանում են ակնկալիքներին։ Ես հասկանում եմ մեր տված խոստումների եւ մեր գործընկերների ակնկալիքների միջեւ եղած տարբերությունը»,- պարզաբանել է Տուսկը եւ նշել, որ հռչակագրի ձեւակերպումների հետ կապված բանավեճերը բարդ են եղել։ «Սակայն ամենակարեւորը գործողություններն են։ Մեր մտադրություններում ոչինչ չի փոխվել»,- ընդգծեց Եվրոպական խորհրդի ղեկավարը։