NEWS.am-ը զգալի կրճատումներով ընթերցողի ուշադրությանն է ներկայացնում Լոս Անջելեսի Կալիֆորնիական համալսարանի մերձավորարեւելյան լեզուների եւ մշակույթների բաժնի դոկտորանտ Սքոթ Աբրամսոնի՝ «Asbarez» պարբերականում հրապարակված հոդվածը:
Սարսափելի տեսարանները ծանոթ են. բեռնատար վագոններ՝ լի մարդկանցով, մարդկանց մահվան երթի տանող զինվորներ, եղբայրական գերեզմաններ, որոնք կլանում են ողջերի եւ մեռածների մարմինները: Այսպիսին են Հոլոքոստի տեսարանները, որոնք մի քանի տխրահռչակ լուսանկարիչներ պատկերել են զանգվածային գիտակցության մեջ: Ավելի պակաս ծանոթ են այլ պատկերներ, որոնք նույն տեսարաններ ներկայացնում, բայց՝ այլ մարդկանցով: Դրանցում զոհերը հայերն են, որոնք, ինչպես եւ հրեաները, հնագույն ժամանակներից վերապրած քիչ ժողովուրդներից են եւ հալածանքների ամենափորձառու վետերանները:
100 տարի անց արդարադատությունը դեռեւս սպասում է իր ժամին, մինչդեռ Օսմանյան կայսրության հետնորդ պետությունը՝ Թուրքիայի հանրապետությունը, իր պատվից ցածր է համարում որեւէ պատասխանատվություն ստանձնելը, էլ չխոսենք տարածքային կամ դրամական փոխհատուցման մասին մի ցեղասպանության համար, որը 1.5 մլն հայերի կյանք է խլել: Սակայն բազմաթիվ երկրների կառավարություններ այնպիսի դիվանագիտություն են վարում, կարծես իրենք նույնպես ենթարկվում են թուրքական գրաքննությանը: Ամերիկյան կառավարությունը դրանցից մեկն է: Վախենալով վիրավորել իր գրեթե յոթանասունամյա թուրքական դաշնակցի զգացմունքները՝ Միացյալ Նահանգները հետեւողականորեն խուսափում է ճանաչել Հայոց ցեղասպանությունը:
Շատերը հույս ունեին, որ նախագահ Օբաման Հայոց ցեղասպանության մասին՝ որպես այդպիսին, կխոսի անցյալ ամիս, երբ նշվում էր 100-րդ տարելիցը: Ամեն դեպքում, երբ հասավ որոշման պահը, Օբաման կանխամտածված լռություն պահպանեց: Կկարողանա՞, արդյոք, Օբաման ճանաչել Հայոց ցեղասպանությունն իր պաշտոնավարությանը մնացած երկու տարիների ընթացքում: Չնայած պատասխանի հարցում գրեթե միանշանակ վստահությանը՝ լրագրողներից մեկն ապրիլի 24-ին կայացած մամուլի ասուլիսի ընթացքում Սպիտակ տան մամուլի քարտուղար Ջոշ Էռնեստին այդ մասին հարց ուղղեց: «Կապի մեջ մնացեք, եւ մենք կտեղեկացնենք ձեզ»,- պատասխանեց Էռնեստը:
Եվ այսպես, պատմությունը կպահպանի այն, որ Հայոց ցեղասպանության 100-րդ տարելիցին այն ճանաչելու մասին հարցին ամերիկյան նախագահի մամուլի քարտուղարը պատասխանեց հայտարարությամբ, որը հարիր էր ոչ թե սկզբունքային պետական գործչին, այլ տեղական լուրերի հաղորդավարին, որը հեռուստադիտողներին խնդրում է չփոխել ալիքը, քանի որ գովազդից հետո եղանակի կանխատեսումն է լինելու:
