Ռիգայի գագաթնաժողովում ընդունված հռչակագիրը ընդգծում է Եվրամիության կողմից «Արեւելյան գործընկերության» անդամ երկրների տարածքային անբաժանելիությունը, անկախությունը եւ ինքնիշխանությունը։ Այս մասին մայիսի 22-ին «Արեւելյան գործընկերության» 4-րդ գագաթնաժողովի մամուլի ասուլիսի ժամանակ հայտարարել է Լատվիայի վարչապետ Լայմդոտա Ստրաույուման։
Նա գագաթնաժողովը գնահատել է որպես կարեւոր քաղաքական իրադարձություն Լատվիայի համար։ «Ես կարծում եմ , որ այս գագաթնաժողովում մենք նոր թափ հաղորդեցինք Հայաստանի, Ադրբեջանի, Բելառուսի, Վրաստանի, Մոլդովայի եւ Ուկրաինայի հետ մեր հարաբերութուններին։ Հռչակագիրը եւս մեկ անգամ հաստատում է այն փաստը, որ գործընկեր երկրների հետ ռազմավարական հարաբերությունները այն կամուրջն են, որը կառուցում են կողմերը։ Մենք հաշվի ենք առնում յուրաքանչյուր երկրում ստեղծված իրավիճակը»,- ընդգծել է Լայմդոտա Ստրաույուման։