«Հայաստան» հիմնադրամի պատվիրակությունը` կազմված հոգաբարձուների խորհրդի անդամներից, տեղական մարմինների ներկայացուցիչներից, բարերարներից, գործադիր տնօրեն Արա Վարդանյանի գլխավորությամբ այսօր այցելությամբ եղավ Լեռնային Ղարաբաղի Ասկերանի շրջանում, որտեղ հանդիսավոր պայմաններում երկու համայնքային կենտրոն բացեց:
Խաչմաչ գյուղի համայնքային կենտրոնը միասնական ուժերով իրականացված ծրագիր է: Այն կառուցվել է Հիմնադրամի Լիբանանի, Բրազիլիայի, Հոլանդիայի, Հունաստանի, Կիպրոսի տեղական մարմինների եւ ԼՂՀ կառավարության համաֆինանսավորմամբ:
Երկհարկանի կառույցում կենտրոնացած գյուղապետարանը, բուժկետը, 150 տեղանոց հանդիսությունների դալիճը եւ համակարգչային սրահը կծառայեն 233 բնակիչ ունեցող գյուղի կարիքներին:
Շոշ գյուղում Հիմնադրամի Ֆրանսիայի տեղական մարմնի/ ԼՂՀ կառավարության համաֆինանսավորմամբ/ կառուցված համայնքային կենտրոնի շնորհիվ էլ համայնքի 610 բնակիչներն արդեն իսկ ունեն բարեկարգ գյուղապետարան, բուժկետ, գրադարան, համակարգչային սենյակ, հանդիսությունների սրահ եւ կարող են նորովի կազմակերպել իրենց առօրյան:
Բացման հանդիսավոր արարողությունները տեղի ունեցան ԼՂՀ վարչապետ Արա Հարությունյանի գլխավորությամբ:
Պատվիրակությունն այցելեց նաեւ Շոշի դպրոց` 2004 թ.կառուցված Հիմնադրամի Տորոնտոյի տեղական մարմնի ջանքերով: Կրթօջախն առ այսօր վայելում է տորոնտոհայերի շարունակական հոգածությունը: Ամիսներ առաջ դպրոցը վերանորոգվել է եւ այսօր` կառուցումից 10 տարի անց, նորովի է ներկայանում համայնքին: