«Արեւելյան գործընկերության» գագաթաժողովի մասնակիցների կողմից ընդունված հռչակագիրը, մասնավորապես, Ուկրաինայի տարածքային ամբողջականությանն աջակցություն է ենթադրում: Փաստաթղթին կարող եք ծանոթանալ նաեւ այստեղ:
Փաստաթուղթն ընդգծում է ճգնաժամի քաղաքական լուծման կարեւորությունը՝ Ուկրաինայի անկախության եւ ինքնիշխանության հարգման հիման վրա, ինչպես նաեւ կոչ է անում իրականացնել 2014 թվականի սեպտեմբերին ձեռք բերված Մինսկի համաձայնությունները: Բացի այդ, նշվում է հակամարտության կարգավորման հարցում ԵԱՀԿ-ի դերը:
Ռուսաստանի կողմից Ղրիմի բռնակցման շուրջ դիրքորոշումը հաստատել են միայն ԵՄ անդամները: Հռչակագիրն անդրադառնում է նաեւ 2014 թվականի հուլիսի 17-ին Դոնեցկի մարզում «Բոինգ 777»-ի ավիավթարի թեմային:
«Գագաթաժողովի մասնակիցները կողմերին կոչ են անում ամբողջական ծավալով մասնակցել միջազգային հետաքննությանն ու քրեական գործընթացներին՝ ուղղված աղետի մեղավորներին պատասխանատվության ենթարկելուն»,- ասված է փաստաթղթում: