Ռիգայում կայացած ԵՄ «Արեւելյան գործընկերության» գագաթաժողովի ժամանակ Եվրահանձնաժողովի նախագահ Ժան-Կլոդ Յունկերը Հունգարիայի վարչապետ Վիկտոր Օրբանին բռնակալ է անվանել: Այս մասին հաղորդում է Euronews-ը:
«Ողջույն, բռնակալ»,- գագաթաժողովին ժամանած Օրբանին ողջունել է Եվրահանձնաժողովի ղեկավարը՝ ակնարկելով Բուդապեշտի կոշտ քաղաքականությունը, այդ թվում՝ սահմանադրական եւ ինստիտուցիոնալ բարեփոխումները, որոնք հարված հասցրեցին մամուլի ազատությանն ու սահմանափակեցին դատական համակարգի իրավասությունները:
«Ողջույն, մեծն դուքս»,- Յունկերին պատասխանել է Հունգարիայի վարչապետը՝ նկատի ունենալով, որ ԵՀ ղեկավարը Լյուքսեմբուրգ դքսությունից է (նա նաեւ 1995-2003 թվականներին զբաղեցրել է այդ երկրի վարչապետի պաշտոնը):
Նշենք, որ հայ-հունգարական հարաբերությունները սառեցվել են հենց հունգարական վարչապետ Օրբանի՝ հայ սպային սպանած Ռամիլ Սաֆարովին Ադրբեջանին փոխանցելու որոշման արդյունքում:
2004 թվականի փետրվարին ՆԱՏՕ-ի «Գործընկերություն հանուն խաղաղության» ծրագրի շրջանակում Բուդապեշտում անգլերենի դասընթացներ էին անցկացվում: Դրանց մասնակցում էին հայ եւ ադրբեջանցի սպաներ, այդ թվում՝ ապագա զոհ Գուրգեն Մարգարյանն ու նրան սպանած Ռամիլ Սաֆարովը: Փետրվարի 19-ի գիշերը Սաֆարովը թափանցում է հայ սպաների սենյակ եւ կացնահարում քնած Գուրգեն Մարգարյանին: Դրանից հետո Սաֆարովը փորձում է սպանել հայ երկրորդ սպային՝ Հայկ Մակուչյանին, բարեբախտաբար՝ անհաջող:
2006 թվականի ապրիլի 13-ին Բուդապեշտի դատարանը Սաֆարովին դատապարտել էր ցմահ ազատազրկման՝ առանց 30 տարի ժամկետով համաներման իրավունքի: Դատարանում Սաֆարովը փոխել էր ցուցմունքները, հրաժարվել նախնական հայտարարությունից՝ պատճառաբելով, որ վատ գիտի ռուսերեն եւ անգլերեն:
2012 թվականի օգոստոսի 31-ին, Վիկտոր Օրբանի որոշմամբ, Սաֆարովին արտահանձնեցին Ադրբեջանին, որտեղ նրան անհապաղ նախագահի կողմից ներում շնորհվեց, բարձրացվեց նրա ծառայողական աստիճանը եւ նվերներ ստացավ՝ բնակարան եւ 8 տարվա աշխատավարձը: Հունգարիայի այդ քայլին ի պատասխան՝ Հայաստանը դադարեցրեց այդ երկրի հետ դիվանագիտական հարաբերությունները: