Բուլղարիան, ըստ էության, ճանաչել է 1915-ի դեպքերը։ NEWS.am-ի թղթակցի հետ զրույցում նման կարծիք է հայտնել Բուլղարիայի Ժողովրդական Ժողովի պատգամավոր Յանակի Ստոիլովը։

Նրախոսքով, ժամանակակից բուլղարների համար այդ փաստը, ըստ ամենայնի, ավելի կարեւոր է, քան «ցեղասպանություն» բառի արտաքին ձեւակերպումը։ Նա հիշեցրել է, որ ապրիլի 24-ին Բուլղարիայի խորհրդարանը ձայների մեծամասնությամբ (157 կողմ, 36 դեմ) բանաձեւ է ընդունել Օսմանյան կայսրությունում հայերի զանգվածային սպանդի մասին («Ցեղասպանություն» բառը բանաձեւի նախնական տարբերակից հանվել էր թուրքամետ ուժերի ճնշման տակ-խմբ.)։

«Բանաձեւը կարեւոր է որպես պատմության տարբեր փուլերում հազարավոր հայերի փրկելու գործում Բուլղարիայի մեծ ավանդի հաստատում։ Կարծում եմ՝ 100-ամյա իրադարձությունների ճանաչումը Բուլղարիային դնում է այն պետությունների կողքին, որոնք ճանաչել են այդ փաստը»,- ասել է նա։

Հարցին, թե չի պատրաստվում արդյոք Բուլղարիայի խորհրդարանը քննարկել սեփական ժողովրդի՝ Թրակիայի բուլղարների ցեղասպանության ճանաչումը նույն թուրքերի կողմից, պատգամավորը խուսափողական պատասխան է տվել. «Չէի ցանկանա այժմ քննարկել այդ խնդիրը։ Այժմ տարբեր նախաձեռնություններ են բերվում, որոնք վերաբերվում են եւ օսմանյան տիրապետման շրջանին։ Նման խնդիրներ մեր պատմության ընթացքում եղել են։ Պետք է իրատեսորեն հաշվի առնել բոլոր հանգամանքները»։