Ստամբուլի Թուզլա թաղամասա Քամփ Արմեն անունը կրող հայկական որբանոցը հայ ժողովրդին վերադարձնելու պահանջով Ստամբուլի հայերի Նոր Զարթոնք շարժումը խոշոր բողոքի ակցի եւ երթ է կազմակերպել:

Թուրքական CNNturk-ի փոխանցմամբ՝ մայիսի 22-ի երեկոյան Ստամբուլի Բեյօղու թաղամասի Թունել կոչվող հատվածում հավաքվել են Ստամբուլի բազմաթիվ հայեր եւ նրանց աջակցող թուրք եւ այլ ազգության ակտիվիստներ: Հավաքվածների ձեռքին եղել են պաստառներ՝ Քամփ Արմենը հետ տվեք հայ ժողովրդին գրություններով:

Բողոքի երթի մասնակիցները քայլել են մինչեւ Գալաթասարայի լիցեյի մոտ, որտեղ հայտարարությամբ է հանդես եկել Նոր Զարթոնք շարժման անդամ Սայաթ Թեքիրը, ով հիշեցրել է, որ Քամփ Արմենը ստեղծվել է 1962 թվականին եւ ընդունել է հայ որբերի, այդ թվում Հրանտ Դինքին եւ նրա տիկնոջը:

Սայաթ Թեքիրը շեշտել է, թե իրենք հերթապահելու են Քամփ Արմենում մինչեւ որոշում կայացվի այն վերադարձնել իրական տերերին՝ հայ ժողովրդին: Հայ ակտիվիստի հայտարարությունից հետո բողոքի ակցիան խաղաղ ավարտվել է:

Նշենք, որ Ստամբուլի «Քամփ Արմեն» մանկատունը 1987-ին զավթվել է թուրքական իշխանությունների կողմից, այնուհետ վաճառվել թուրք գործարարի։ Վերջինս էլ որոշել է քանդել մանկատունը եւ էլիտար տներ կառուցել։ Հասարակական ճնշման արդյունքում մանկատան քանդումը ժամանակավորապես դադարեցվել է։