Մալաթիայի նախկին թաղապետ, վաղամեռիկ Վահան Զատիկյանի որդու՝ 26-ամյա Սեդրակ Զատիկյանի սպանության գործով հետախուզման մեջ գտնվող եւ վերջերս հայտնաբերված Նարեկ Խաչատրյանը ամբաստանյալ Ստեփան Հակոբյանի ընկերն է: Այս մասին հայտնեցին NEWS.am-ի աղբյուրները:
Մեր տեղեկություններով՝ ըստ գործի նյութերի՝ ներկայացվում է, որ Ստեփան Հակոբյանը եւ Նարեկ Խաչատրյանը միասին են կազմակերպել սպանությունը: Այժմ մեղադրյալի հայտնաբերումից հետո նոր քննություն պետք է լինի:
Դիմեցինք Ստեփան Հակոբյանի փաստաբան Երեմ Սարգսյանին՝ հարցով, թե հետախուզվողի հայտնաբերումը կարող է ազդել իր պաշտպանյալի վրա: Նա նշեց, որ այս գործի վրա ազդեցությունը տեսականորեն չեն կարող բացառել, բայց այդ հարցին կարող են անդրադառնալ գործի ավարտից հետո: «Այդ գործով գրեթե ապացույցները, որոնք մեղադրանքի հիմքում են, անթույլատրելի են, սակայն կոնկրետ ինչ-ինչ հանգամանքերից ելնելով թույլատելի են ճանաչվել, օրինակ՝ հեռախոսի վերծանումները առանց դատարանի որոշման են եղել: Եթե օբյկետիվ լիներ, որոշ ապացույցներ պետք է անթույլատրելի ճանաչվեին ու դա էլ կհանգեցներ կոնկրետ այլ հետեւանքների, այյսինքն՝ մեղադրանքը հիմնավորող բոլոր ապացույցները անթույլատրելի են»,-ասաց Երեմ Սարգսյանը:
Հիշեցնենք, որ Մալաթիայի նախկին թաղապետ, վաղամեռիկ Վահան Զատիկյանի տղան՝ 26-ամյա Սեդրակ Զատիկյանը սպանվել է 2006թ. հունիսի 22-ին` ժամը 14:45-ի սահմաններում, Սեբաստիա եւ Տիչինա փողոցների խաչմերուկում՝ «ԱԿՍ» տեսակի ինքնաձիգից արձակված կրակոցների հետեւանքով, նույն վայրում կրակոցներից մահացել է նաեւ անցորդ, 42-ամյա Կարինե Սարգսյանը: Զատիկյանը մահացել է հիվանդանոցի ճանապարհին: Ստեփան Հակոբյանը մեղադրվում է Նարեկ Խաչատրյանի հետ նախնական համաձայնությամբ Սեդրակ Զատիկյանի սպանությունը Արսեն Առուշանյանին պատվիրելու համար։ Վերաքննիչ դատարանը մերժել է բեկանել Մալաթիա-Սեբաստիա վարչական շրջանների ընդհանուր իրավասության դատարանի` Հակոբյանին դատապարտելու վերաբերյալ կայացրած վճիռը եւ նրան չի արդարացրել: Մյուս կողմը եւս դիմել էր Վերաքննիչ դատարան՝ պահանջելով ցմահ ազատազրկում Ստեփան Հակոբյանի նկատմամբ, այդ դիմումը եւս մերժվել է: Վճռաբեկ դատարանը դիմումը վարույթ չէր ընդունել: Նրանք ՄԻԵԴ չեն դիմել: Ոստիկանությունը հայտնաբերել է Մալաթիայի նախկին թաղապետ, վաղամեռիկ Վահան Զատիկյանի որդու՝ 26-ամյա Սեդրակ Զատիկյանի սպանությունը կազմակերպած և միջազգային հետախուզման մեջ գտնվող Նարեկ Խաչատրյանին:
