Պաշտոնատար անձանց տների վրա հարձակումներ գործելու համար մեղադրվող, այսպես կոչված «Բանդայի գործով» դատապարտված, «Բանդայի» պարագլուխ համարվող Արտուշ Հակոբյանի պաշտպանը Վերաքննիչ դատարանի վճիռը բողոքարկելու է ՀՀ Վճռաբեկ դատարանում: Այս մասին այսօր՝ մայիսի 23-ին, NEWS.am-ի հետ զրույցում ասաց Արտուշ Հակոբյանի պաշտպանը՝ Հովիկ Արսենյանը:
«Վերաքննիչ դատարանի որոշումը դեռ չեմ ստացել, ոչինչ չեմ կարող ասել, թե ինչպես է հիմնավորել նման խայտառակ վճիռը, բայց անպայման բողոքարկելու եմ Վճռաբեկ դատարանում»,-ասաց նա:
Հովիկ Արսենյանը կրկին պնդեց, որ «Բանդայի գործով» անմեղ մարդկանց են իրականում դատապարտել:
Նշենք, որ Երեւանի Կենտրոն եւ Նորք Մարաշ համայնքների ընդհանուր իրավասության դատարանը դեկտեմբերի 26-ին «Բանդայի» պարագլուխ համարվող Արտուշ Հակոբյանին դատապարտեց 15, Դավիթ Գալստյանին եւ Սամվել Դավթյանին՝ նույնպես 15, Արթուր Մանուկյանին՝ 11 տարվա ազատազրկման՝ առանց գույքի բռնագրավման: Մայիսի 12-ին Վերաքննիչ դատարանը անփոփոխ թողեց առաջին ատյանի դատարանի վճիռը:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցագործության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված, ապա դատապարտված Արտուշ Հակոբյանը, Քյարամ Ամոյանը, Արթուր Մանուկյանը, Դավիթ Գալստյանը եւ Սամվել Դավթյանը մեղադվոր են ճանաչվել բարձրաստիճան պաշտոնատար անձանց բնակարաններում, առանձնատներում ավազակային հարձակումներ իրականացնելու մեջ: Ամբաստանյալները պնդում են, որ իրենք մեղավոր չեն, գործը բարդել են իրենց վրա:
