Ավստրալիայում Հայոց ցեղասպանության թեմայով քննարկումը չեղյալ են հայտարարել այն բանից հետո, երբ թուրք ժխտողականների ներկայության պատճառով Նոր Հարավային Ուելս նահանգի գանձապետ Գլեդիս Բերեջիքլյանը եւ հայ համայնքի անդամները լքել են դահլիճը: Այս մասին գրում է «The Sydney Morning Herald»-ը:
Քննարկումը պետք է անցկացվեր Սիդնեյում եւ Մելբուռնում գերմանական ֆիլմերի փառատոնի շրջանակում թուրքական ծագմամբ գերմանացի ռեժիսոր Ֆաթիհ Ակինի «Սպի» ֆիլմի ցուցադրությունից հետո: Կինոփառատոնի տնօրեն եւ Գյոթեի ինստիտուտի ղեկավար Արպադ Զյոլտերի խոսքով, «նախարարին անհանգստացրել է նույն հարթակում Ցեղասպանության ժխտողների ներկայությունը»:
Նոր Հարավային Ուելսի գանձապետի մամուլի քարտուղարը հրաժարվել է հաստատել, որ պատճառը դա է եղել:
Իսկ Զյոլտերը նաեւ հավելել է, որ երբ նախարարը հեռացել է, հայ համայնքի մյուս ներկայացուցիչները նույնպես լքել են դահլիճը: «Եթե երկխոսության հնարավորություն չկա, իսկ մեր նպատակն այդ էր, նշանակում է՝ պետք է քննարկումը չեղյալ հայտարարելու որոշում կայացվեր»,- ասել է նա: