Էլեկտրաէներգիայի թանկացման դեմ պայքարող «Ոչ թալանին» նախաձեռնության կազմակերպած իրազեկման ավտոերթն այսօր՝ մայիսի 23-ին, ավարտվեց:
Նախաձեռնության անդամենրը Երեւանի տարբեր վարչական շրջաններում թռուցիկներ բաժանեցին քաղաքացիներին՝ հորդորելով նրանց մասնակցել մայիսի 27-ին, ժամը 19:00-ին կայանալիք հավաք երթին՝ ընդդեմ էլեկտրաէներգիայի սակագնի բարձրացման:
«Այսօրվա մեր իրազեկմա ավտոերթն անշուշտ արդյունք տվեց, քանի որ ակնհայտ էր քաղաքացիների հետաքրքրությունը: Մալաթիա Սեբաստիա վարչական շրջանում մարդիկ մոտենում էին մեզ հատուկ թռուցիկ վերցնելու համար, նույնիսկ քաղցրավենիք մեզ հյուրասիրեցին: Ամսի 27-ին կայանալիք ակցիային հուսով եմ, որ մեծ թվով քաղաքացիներ կմասնակցեն՝ գիտակցելով, որ մենք չպետք է ուրիշի փոխարեն վճարենք»,-NEWS.am-ի հետ զրույցում ասաց «Ոչ թալանին» նախաձեռնության անդամ Մաքսիմ Սարգսյանը:
Նշենք, որ ՀԷՑ-ը դիմել է Հանրային ծառայությունների կարգավորող հանձնաժողովին՝ հոսանքի սակագինը, նախնական մոտ 16 դրամով բարձրացնելու համար։ Հոսանքի թանկացմանը կհաջորդի առաջին անհրաժեշտության ապրանքների թանկացումը, որը մեծ հարված կլինի ցանկացած ՀՀ քաղաքացու գրպանին։
