Հայտնի բժիշկ եւ հիվանդանոցային ծաղրածու Պետչ Ադամսի հայաստանյան այցը կազմակերպած «Հայաստանի զարգացման նախաձեռնություններ» (IDeA) հիմնադրամի համահիմնադիր Ռուբեն Վարդանյանին հայ ծանոթները հորդորել են ծաղրածուին Հայաստան չհրավիրել` պնդելով, որ այստեղ նրան չեն ընդունի: Այս մասին այսօր՝ մայիսի 24-ին, լրագրողներին ասաց Ռուբեն Վարդանյանը:
«Ես անհագիստ էի: Երբ հրավիրեցի նրան ու նրա ընկերներին, ինձ մի քանի հայ ասացին, որ պետք չի անել, Հայաստանում չի ընդունվելու, շատ դժվար է լինելու, որ Հայաստանում իրենց պահելաձեւը ընդունված չէ: Ահագին երկար ինձ փորձում էին համոզել, որ չգան: Բայց ես շատ ուրախ եմ, երջանիկ եմ, որ իրենք եկան: Ասում էին՝ հանկարծ Գյումրի չգնա, չեն ընդունի: Իսկ հիմա պարզ երեւում է, որ մարդիկ Հայաստանում պատրաստ են ժպտալու, հասկանալու, թե ինչքան կարեւոր է այն ամենը, ինչ իրենք անում են»,- ասաց նա:
Նշենք, որ բժիշկ, ծաղրածու, հիվանդանոցային ծաղրածուական արվեստի հիմնադիր Պատչ Ադամսը Հայաստան է ժամանել մայիսի 18-ին՝ մեկշաբաթյա այցով: Նա այցելել է «Արաբկիր» կլինիկա, Գյումրիի մանկատուն: Մայիսի 26-ին հիվանդանոցային ծաղրածուն դասախոսությամբ հանդես կգա Հայաստանի ամերիկյան համալսարանում:
