Մեծ Բրիտանիայում Եվրամիության կազմից դուրս գալու հարցով անցկացվելիք հանրաքվեին կարող են մասնակցել միայն բրիտանացիները, իռլանդացիները եւ Ազգերի համագործակցության անդամ մյուս երկրների քաղաքացիները։
Քվեարկելու իրավունք կունենան 18 տարին լրացած եւ Մեծ Բրիտանիայում ապրող անձինք։ Քվեարկության իրավունք կունենան նաեւ 15 տարուց ոչ ավել այլ պետություններում ապրող բրիտանացիները եւ Ջիբլարթարում ապրող Ազգերի համագործակցության անդամ մյուս երկրների քաղաքացիները, գրում է «ՌԻԱ Նովոստի»-ն՝ Reuters-ի հղումով։
Independent-ը նշում է, որ քաղաքացիություն չունեցող միգրանտները չեն կարող մասնակցել հանրաքվեին այն դեպքում, երբ Եվրախորհրդարանի բրիտանացի պատգամավորների ընտրության ժամանակ նրանց տալիս են ձայնի իրավունք։