Հայաստանի արդարադատության նախարար Հովհաննես Մանուկյանը հույս ունի, որ արդարությունը կհաղթի։ Մայիսի 25-ին կայացած մամուլի ասուլիսի ժամանակ նախարարին մի շարք հարցեր հղեցին Սյունիքի մարզպետ Սուրիկ Խաչատրյանի վրա կատարած մահափորձի եւ նրա որդու մասնակցությամբ տեղի ունեցած սկանդալային միջադեպի կապակցությամբ։

Նախարարը կոռեկտ չհամարեց մեկնաբանել ՀՀ գլխավոր դատախազ Գեւորգ Կոստանյանի հայտարարությունն այն մասին, թե օրենքը բոլորի համար հավասար է, թեպետ համաձայնվեց, որ անհատների անունները նշանակություն չունեն։

Նախարարը նաեւ հրաժարվեց մեկնաբանել կարծիքն այն մասին, թե հարձակումը սարքած է եղել, եւ նշեց, որ նման հարցը լուրջ չէ։

Խուսափելով կոնկրետ պատասխաններից՝ նախարարը ամեն դեպքում հայտարարեց, որ հույս ունի, թե հետաքննությունը կունենա իր տրամաբանական ավարտը, եւ արդարությունն ու օրենքը կհաղթեն։