Արարատի մարզի Նարեկ գյուղի բնակիչներն այսօր՝ մայիսի 25-ին, հավաքվել են գյուղապետարանի մոտ եւ պահանջում են փոխհատուցել մայիսի 23-ին տեղացած ուժեղ կարկուտի վնասները:
NEWS.am-ի հետ զրույցում Նարեկի գյուղապետ Գարուշ Հակոբյանը հայտնեց, որ երկու օր առաջ տեղացած կարկուտը մեծ վնաս է հասցրել գյուղացիներին:
«Ստեղծվել է հանձնաժողով, որն այս պահին դաշտերում ուսումնասիրում է իրավիճակը՝ հասկանալու համար, թե ինչքան է վնասը: Ամեն դեպքում կա գյուղացի, որի բերքը 100 տոկոսով փչացել է, կա մարդ, որի բերքի 70 տոկոսն է վնասվել: Միանշանակ չենք կարող ասել, թե ինչքան է վնասը, բայց որ այգիներին, ցանքատարածություններին մեծ վնաս է հասցվել, դա հաստատ է»,- ասաց գյուղապետը:
Նա նշեց, որ հավաքված գյուղացիները քիչ առաջ հանձնաժողովի անդամների հետ գնացել են իրենց ցանքատարածություններ՝ տեղում ծանոթացնելու իրավիճակին:
Նշենք, որ ըստ Shamshyan.com-ի՝ Նարեկի գյուղացիները սպառնում են փակել Երեւան տանող ճանապարհը:
Հիշեցնենք, որ ՏԿԱԻՆ մամուլի ծառայությունը հայտնել էր, որ մայիսի 23-ի երեկոյան Արարատի մարզի Քաղցրաշեն և Նարեկ գյուղերի տարածքներում տեղացել է կարկուտ: Վնասի չափերը ճշտվում են: Տարածքները «ՄԵՎԱՆԾ» ՊՈԱԿ-ի կողմից չեն վերահսկվում:
