Հայաստանի վարչապետ Հովիկ Աբրահամյանը ճնշում չի գործադրել իր որդի Արգամի քաղաքական կարիերան դասավորելու օգտին։ Այս մասին մայիսի 25-ին խորհրդարանում հայտարարեց ՀՀ ԱԺ փոխխոսնակ Հերմինե Նաղդալյանը՝ մեկնաբանելով հունիսի 7-ին Արտաշատում կայանալիք քաղաքապետի ընտրությունները։
3 թեկնածուներից մեկը՝ Գարեգին Համբարձումյանը, հայտարարել է ինքնաբացարկի մասին։ Մյուս երկուսն են Հովհաննես Ղազարյանը՝ (հայտնի որպես «Գազի Հովո») եւ Արգամ Աբրահամյանը՝ վարչապետ Հովիկ Աբրահամյանի որդին։ Սակայն օրերս ինքնաբացարկ հայտարարեց նաեւ Հովհաննես Ղազարյանը։
Այդուհանդերձ Նաղդալյանը չի ցանկանում այստեղ վարչապետի կողմից գործադրած ճնշում տեսնել։ Նա կարծում է, որ թեկնածուները պարզապես գնահատել են իրենց ուժերը։ «Եթե դուք դրա մեջ ճնշում եք տեսնում, ես ձեզ հետ միասին պատրաստ եմ պաշտպանել օրենքը։ Սակայն մերժել մարդու քաղաքական կարիերա կառուցելու որոշումը միայն այն պատճառով, որ նա վարչապետի որդին է, կարծում եմ արդարացի չէ»,- ասաց Նաղդալյանը։
Նա հիշեցրեց, որ ժամանակին ՀՀԿ-ն պաշտպանել է նաեւ նախկին վարչապետ Անդրանիկ Մարգարյանի որդու՝ 27-ամյա Տարոնի թեկնածությունը Ավան վարչական շրջանի ղեկավարի ընտրություններում։ «Կուսակցությունը նրա մեջ ներուժ էր տեսնում եւ Մարգարյան որդին չհիասթափեցրեց մեզ ո՛չ այն ժամանակ, ո՛չ էլ հիմա՝ քաղաքապետի պաշտոնը զբաղեցնելու օրոք»,- վստահ է ՀՀԿ պատգամավորը։