Հարեւանների կողմից դաժան ծեծի ենթարկվելուց հետո մահացած, ազատամարտիկ 52-ամյա Վարդան Թումանյանի գործով տուժողի իրավահաջորդի ներկայացուցիչ Հայկ Ալումյանը չի ցանկանում մեկնաբանել մեղադրական եզրակացությունը:
NEWS.am-ի հետ զրույցում փաստաբանը նշեց, որ մեղադրանքը հիմնված է միայն երկրորդ փորձաքննության եզրակացության հիման վրա:
«Մենք համոզված ենք, որ Վարդան Թումանյանի մահվան պատճառն նրանց հասցրած վնասվածքն է եղել»,- ասաց Հայկ Ալումյանը:
Նշենք, որ ըստ մեղադրական եզրակացության՝ Սարգիս Ղուկասյանը եւ Գեւորգ Սարգսյանը՝ «Ջունգլը», Վիկտոր Հովսեփյանի հետ ծեծի են ենթարկել Վարդան Թումանյանին՝ դիտավորությամբ նրա առողջությանը պատճառելով միջին ծանրության վնաս՝ առողջության տեւական քայքայումով:
Հիշեցնենք, որ առաջին փորձաքննությամբ պարզվել էր, որ Վարդան Թումանյանը մահացել է ծեծի հետեւանքով, մինչդեռ կրկնակի փորձաքննությունը ցույց էր տվել, որ ազատամարտիկի մահվան եւ ծեծի միջեւ պատճառահետեւանքային կապ չկա: Դրանից հետո «Ջունգլի» եւ Սարգիս Ղուկասյանի խափանման միջոցը փոխվել էր:
Ինչպես ավելի վաղ հաղորդել էր NEWS.am-ը, սպանված ազատամարտիկի հարազատների խոսքով՝ 2014թ. հուլիսի 13-ին հարեւանների՝ Վարդան Թումանյանի եւ Բաբկեն Սարգսյանի միջեւ վիճաբանություն էր առաջացել շախմատի խաղի ժամանակ, ավելի ուշ Բաբկեն Սարգսյանի հարազատները՝ Գեւորգ Սարգսյանն ու Սարգիս Ղուկասյանը, եկել էին Վարդան Թումանյանի հետ «զրուցելու», տնից դուրս հրավիրել ու դաժան ծեծի ենթարկել դստեր եւ կնոջ ներկայությամբ։ Մի քանի օր անց Վարդան Թումանյանը հիվանդանոցում մահացել էր։ Վարդան Թումանյանի մահվան առնչությամբ հարուցվել էր քրեական գործ Քրեական օրենսգրքի 112-րդ հոդվածի 2-րդ մասի 6-րդ, 14-րդ կետերով, այն է՝ դիտավորությամբ առողջությանը ծանր վնաս պատճառելը, որը կատարվել է մի խումբ անձանց կամ կազմակերպված խմբի կողմից, եւ անզգուշությամբ առաջացրել տուժողի մահ:
