Սննդամթերքի անվտանգության պետական ծառայության Սննդամթերքի արտադրության վերահսկողության բաժնի պետ Վահե Դանիելյանը բացառում է, որ Արմավիրի N 9 մանկապարտեզում աղիքային վարակը առաջացած լինի ժամկետանց կաթից: Այս մասին այսօր՝ մայիսի 25-ին, լրագրողների հետ զրույցում ասաց Վահե Դանիելյանը:
«Մենք նայել ենք ճաշացանկերը, երեխաներին տվել են կաթով շիլա եւ բրնձով սուպ: Սննդի մատակարարը այդ մանկապարտեզում հանդիսանում է մեկ տնտեսվարող սուբյեկտ, կաթ արտադրողն այլ կազմակերպություն է: Կաթի առաջնային աղտոտվածության խնդիրը ես միանշանակ բացառում եմ, քանի որ այդ նույն կաթը իրացվում է Հայաստանի ամբողջ տարածքում, եւ բացի մանկապարտեզի դեպքից այլ ահանզանգեր չենք ստացել»,- ասաց Վահե Դանիելյանը՝ նշելով, որ հնարավոր է՝ վարակը առաջացած լինի մանկապարտեզի հակասանիտարական պայմաններից:
Վահե Դանիելյանը նշեց, որ վարակի հիմնական աղբյուրի մասին հստակ պատասխան առայժմ չկա, պետք է համադրել իրենց եւ Առողջապահության նախարարության իրականացրած փորձաքննությունների արդյունքները:
Նշենք, որ NEWS.am-ի հետ զրույցում Արմավիրի N 9 մանկապարտեզի՝ վարակված 6 սաների մայրերը պնդել էին, որ սուր վարակն առաջացել է ժամկետանց կաթից։
Ըստ Առողջապահության նախարարության տարածած հաղորդագրության՝ Արմավիր քաղաքի թիվ 9 եւ թիվ 6 մանկական նախադպրոցական կազմակերպություններում արձանագրված` սննդային գործոնով պայմանավորված աղիքային վարակի տեղային (լոկալ) բռնկումները երկրորդային աղտոտվածության հետեւանքով են:
Մայիսի 22-ի դրությամբ Արմավիր եւ Մեծամորի բժշկական կենտրոնների ինֆեկցիոն բաժանմունքներում հոսպիտալացված է միջին ծանրության 16 հիվանդ: