Էջմիածնի մայրուղում` «Զվարթնոց» ռեստորանի մոտակայքում գտնվող գազալցակայանը, որտեղ պայթյուն է եղել, 2-3 տարի է՝ չի անցել փորձաքննություն: Այս մասին NEWS.am-ի թղթակցի հետ զրույցում ասաց Տեխնիկական անվտանգության ազգային կենտրոնի տնօրենի տեղակալ, Երեւան քաղաքի ծառայության պետ Վոլոդյա Հովսեփյանը:
Նա նշեց, որ վերջին անգամ՝ մոտ 15 օր առաջ, Տեխնիկական անվտանգության եւ հակահրդեհային տեսչությունը 1մլն դրամով տուգանել է ընկերությանը: Վոլոդյա Հովսեփյանը նշեց, որ այժմ նշանակված է տեխնիկական քննություն, որի արդյունքում կպարզվեն դեպքի պատճառները, գազալցակայանի հետագա շահագործման ճակատագիրը: Այժմ ժամանակավորապես այս գազալցակայանի աշխատանքը կդադարեցվի:
Մեր տեղեկություններով՝ գազալցակայանը պատկանում է նախկին պատգամավոր, վերջերս ազատ արձակված Հակոբ Հակոբյանին՝ Ճոյտին:
Նշենք, որ սա արդեն այս ամսվա ընթացքում գազալցակայանում պայթյունի երրորդ դեպքն է, բարեբախատաբար, այս դեպքում գոնե զոհեր չկան: Մայիսին տեղի է ունեցել եւս երկու դեպք, որի արդյունքում զոհվել է 1, վիրավորվել մի քանի մարդ: Դեպքերից 2-ի մասով գազալցակայանը փորձաքննություն անցած չի եղել, մի դեպքով էլ խնդիրը մեքենայի գազի բալոնի հետ էր կապված:
Ավելի վաղ հայտնել էինք, որ Արմավիրի մարզի Զվարթնոց գյուղի գազալցակայաններից մեկում, այսօր՝ մայիսի 25-ի առավոտյան, պայթյուն է տեղի ունեցել, ինչի հետեւանքով 3 մարդ վիրավորվել է: Հրդեհը, նախնական տվյալներով առաջացել է կոմպրեսորային կայանից,, որի հետեւանքով պայթել է Volkswagen մակնիշի 34 QF 306 համարանիշի ավտոմեքենան: Մեքենան պատկանում է նախկին ԱԺ պատգամավոր Հակոբ Հակոբյանի (Ճոյտ) հարազատներին կիսով չափ այրվել է: Պայթյունի հետեւանքով վիրավորվել են մեքենայի կողքին գտնվող Հակոբ Հակոբյանի եղբայրը եւ որդին, ինչպես նաեւ գազալցակայանի աշխատողը:
Նշենք, որ գազալցակայանը, ըստ մեր տեղեկությունների, պատկանում Հակոբ Հակոբյանին: Դեպքի վայրում աշխատում են հրշեջ փրկարարները: Վիրավորներին տեղափոխել են «Վաղարշապատի» ԲԿ, որտեղից էլ Երեւան: