Գողության եւ անարդյունավետ կառավարման համար սպառողը չպետք է վճարի։ Այս մասին այսօր՝ մայիսի 26-ին, լրագրողների հետ զրույցում ասաց կառավարության աշխատակազմի ղեկավար-նախարար Դավիթ Հարությունյանը՝ պատասխանելով հարցին, թե ինչու ՀԷՑ-ի անարդյունավետ աշխատանքի համար հասարակությունը վճարի։
Նրա խոսքով՝ անարդյունավետ կառավարման համար պետք է վճարի սեփականատերը։
«Եթե անջուր տարի է, ունենք քիչ էլեկտրաէներգիա, ապա սպառողը պետք է ստիպված վճարի։ Մյուս դեպքում ոչ։ Հարցն իրականում ուղղված է այն հանձնաժողովին, որը պետք է որոշում կայացնի»,- ասաց նախարարը։
Հարցին, թե ինչո՞ւ գողության փաստով քրեական գործ չի հարուցվում, Դավիթ Հարությունյանը պատասխանեց. «Հաղորդում տվեք, թող քրգործ հարուցվի։ Եկեք բացենք փակագծերը եւ հասկանանք, թե ինչի մասին է խոսքը: Յուրաքանչյուր նման ընկերություն ունենում է առեւտրային կորուստներ, որը որոշ տեղերում կարող է լինել գողություն, որը մենք հաշվարկել չենք կարող։ Բայց սա սեփականատիրոջ գրպանից կատարվող գողություն է։ Թող առաջին հերթին սեփականատերը մտածի»։
Կառավարության աշխատակազմի ղեկավարի համար ակնհայտ է, որ անթույլատրելի է գողությունը սպառողի գրպանից։
